«Shyǵys–Batys» baǵytyn tolyq qamtımyz» — Qazaqstan aýqymdy termınaldar júıesin quryp jatyr
ASTANA. KAZINFORM — Qazaqstan arqyly ótetin kólik baǵyttaryna qosymsha júk aǵynyn tartý úshin álemdegi júk tasymalyn qalyptastyratyn núktelerde termınal ınfraqurylymyn keńeıtý maqsatynda aýqymdy jumys júrip jatyr. Bul týraly Kólik saıasaty departamentiniń dırektory Dinmuhamed Sembaev aıtty.
— Máselen Lıanıýngan portynda 2014 jyldan beri Qytaı–Qazaqstan halyqaralyq logıstıkalyq termınaly jumys istep tur, odan jylyna 410 myń konteıner ótedi. Bul termınaldyń jumysy Azııa–Tynyq muhıty aımaǵy elderinen keletin júk aǵynyn tartýǵa jáne Qazaqstan baǵytyna ımporttyq tasymaldardy shoǵyrlandyrýǵa baǵyttalǵan, — dedi ol Qazaqstannyń eksporttaýshylar forýmynda.
Sondaı-aq spıker Qytaıda jáne Grýzııada iske qosylǵan porttardy atap ótti.
— 2024 jyly Sıan qalasyndaǵy qurǵaq portta birlesken termınal iske qosyldy. Bul ortalyqtan jylyna 133 myń konteıner ótedi. Termınal Qytaı–EO, Qytaı–Ortalyq Azııa, Qytaı–THKB baǵyttary boıynsha júkti toptastyryp, konteınerlik poıyzdar arqyly jóneltýge baǵyttalǵan. Sonymen qatar, jeke bıznes bastamasymen Potı portynda jylyna 120 myń konteıner ótkizýge qabiletti «Potı TransTermınal» AQ termınaly salyndy, — dedi Dinmuhamed Sembaev.
Odan bólek departament basshysy qazirgi ýaqytta da birneshe termınal salynyp jatqanyn aıtty.
— Tashkent (Ózbekstan), Alıat (Ázerbaıjan) jáne Vengrııada da termınaldar salynyp jatyr. Taǵy bir iri termınal Máskeý mańyndaǵy Selıatıno stantsııasynda salynyp jatyr, ol — jyldyq ótkizý qabileti 500 myń konteıner bolatyn iri joba, — dedi ol.
Spıkerdiń aıtýynsha, termınal ınfraqurylymy tizbeginiń sońǵy nysany — Shyǵys Eýropaǵa kireberis qaqpa sanalatyn Svısloch stantsııasy bolmaq. Bul jobanyń shamamen jyldyq qýattylyǵy — 100 myń konteıner. Negizgi qyzmeti — eýropalyq temirjol tabanynan bizdiń keń temirjol tabanyna jáne keri baǵytta konteınerlerdi aýystyryp tıeý.
— Osylaısha, biz «Shyǵys — Batys» baǵytyn tolyq qamtımyz. Sonymen qatar, bolashaqta Rýmynııanyń Konstantsa portynda jáne Qytaıdyń (ShUAR) Úrimshi qalasynda birlesken termınaldar ashý múmkindigi qarastyrylyp jatyr. Nátıjesinde syrtqy termınaldardyń jıyntyq ótkizý qabileti 5 esege artyp, jylyna 2,5 mıllıon konteınerge jetedi, — dedi Dinmuhamed Sembaev.
Aıta ketsek, Qazaqstan kólik-logıstıkalyq ınfraqurylymdy damytýǵa sońǵy 15 jylda 35 mlrd dollar ınvestıtsııalady.
Al 2027 jyly Transkaspıı kólik baǵytynyń júk ótkizý kólemi 10 mln tonnaǵa jetedi.