Shyǵys óńirine gaz tartý máselesi qashan sheshiledi
ASTANA. KAZINFORM – Búgin Májilistiń jalpy otyrysynda depýtat Ulyqbek Tumashınov elimizdiń soltústik jáne shyǵys óńirlerine gaz tartý máselesin kóterdi.
- Shyǵys Qazaqstanda qys mezgili alty jarym aıǵa deıin sozylady. Qazirgi tańda shyǵys óńirindegi turǵyndardyń basty suraǵy: «gazdandyrý máselesi qashan sheshiledi?». Bul suraqtyń ózektiligi — sońǵy jyldary kómir baǵasynyń sharyqtaýymen jáne onyń sapasynyń syn kótermeýimen baılanysty. Aýyldyq jerlerde kómir baǵasy 30 myń teńgege deıin jetti, al onyń sapasy turǵyndardy alańdatyp otyr. Bıylǵy qys mezgilinde Óskemen qalasynda ekologııalyq ahýaldyń ýshyǵýy nátıjesinde mektep oqýshylary on kún boıy sabaqtaryn qashyqtan oqýǵa májbúr boldy. Bul jaǵdaı – kómirdiń tómen sapasy men balamaly ekologııalyq taza energııa kózderiniń jetispeýshiliginiń aıqyn kórinisi, - dedi U.Tumashınov Premer-mınıstrdiń atyna joldaǵan saýalynda.
Onyń aıtýynsha, búginde elimizdegi gazdandyrý máselesi Shyǵys Qazaqstan, Abaı, Pavlodar jáne Soltústik Qazaqstan oblystaryna qatysty. Ásirese, Shyǵys Qazaqstannyń shekara mańyndaǵy aýdandaryn gazben qamtý — asa ózekti.
- Mamyr aıynda Zaısan aýdanynyń halqymen kezdesý barysynda turǵyndar gazdandyrý máselesin taǵy da kóterdi. Gaz kenishiniń ústinde otyryp, kógildir otynǵa qol jetkize almaý – Zaısan halqy úshin túsiniksiz ári ádiletsiz jaǵdaı. Aýdandaǵy gazdy ıgerip otyrǵan ınvestor gaz qorynyń azaıyp kele jatqandyǵy jóninde málimdep jatyr, sondyqtan memlekettik organdar Zaısannyń keıbir eldi mekenderine gaz qubyryn tartýǵa qarsy bolyp otyr. Olaı bolsa, halyqty gazben qamtýdyń balama joldaryn oılastyrý kerek. Ol Reseıden keletin nemese Qazaqstannyń ońtústiginen keletin gazǵa magıstraldy qubyr tartý mańyzdy. Osyǵan oraı, sizden halyq úshin asa mańyzdy bul máseleni jáne atalǵan oblystardy gazdandyrýdy kún tártibine qoıýyńyzdy suraımyn, - dedi depýtat.
Buǵan deıin Energetıka mınıstrligi qazirgi tańda soltústik óńirdi gazdandyrý máselesin sheshýde eki negizgi jol qarastyrylyp otyrǵanyn, ıaǵnı otandyq gaz resýrstary men Reseıden gaz ımporttaý pysyqtalyp jatqanyn habarlady.