Shyǵys Qazaqstannyń taǵy tórt aýdanynda jumys ýaqyty bir saǵatqa keri shegerildi

ÓSKEMEN. KAZINFORM – Shyǵys Qazaqstan oblysyndaǵy Tarbaǵataı, Zaısan, Kúrshim jáne Samar aýdandarynyń turǵyndary jumysty tańǵy 08:00-de bastap 17:30-da aıaqtaıdy.

Naýryz aıynan bastap Shyǵys Qazaqstannyń tórt aýdanynda jumys kestesi ózgerdi. Endi Tarbaǵataı, Zaısan, Kúrshim jáne Samar aýdandarynyń turǵyndary 08:00–17:30 aralyǵynda jumys isteıdi. Al túski úzilis saǵat 12:00–den 13:30–ǵa deıin. 

— Bul jańashyldyq óńirdiń tabıǵı erekshelikterimen — erte tań atyp, kúnniń erte batýymen baılanysty. Jańa keste halyqqa kúndizgi jaryqty tıimdi paıdalaný múmkindigin beredi. Ózgerister mektepterge, balabaqshalarǵa jáne medıtsınalyq mekemelerge áser etpeıdi. Sebebi olar buǵan deıin de osy keste boıynsha jumys istep kelgen, — dep habarlady óńir ákimdiginen. 

Zaısan aýdanynyń ákimi Aelıta Ahmetsəlimqyzy bul sheshim jergilikti turǵyndardyń pikiri eskerile otyryp qabyldanǵanyn atap ótti.

— Bul sheshimdi qabyldamas buryn, biz ár aýyldyq okrýgte jınalys ótkizdik. Turǵyndar bul bastamany qoldady. Sebebi Zaısan aýdany Shyǵys Qazaqstan oblysynyń shyǵys shekarasyna eń jaqyn ornalasqan. Sondyqtan bizde kún erte shyǵady. Jańa jumys kestesi halyqqa áldeqaıda qolaıly. Jumystan keıin úı sharýasyna, balalarǵa jáne jaqyndaryna kóbirek ýaqyt qalady, — dedi ol. 

Aıta keteıik, buǵan deıin jyl basynan beri oblystyń úsh aýdanynda osyndaı jumys rejımi engizilgen bolatyn. Qańtar aıynda Katonqaraǵaı aýdany jańa kestege kóshse, aqpanda Úlken Naryn jáne Marqakól aýdandarynda da osyndaı ózgeris jasaldy.