Shyǵys Qazaqstandaǵy jer úılerde bıyl 21 adamǵa ıis tıgen
ÓSKEMEN. KAZINFORM – Shyǵys Qazaqstan oblysynda 1 qazanda bastalatyn jylytý maýsymy qarsańynda turǵyn úı sektoryndaǵy profılaktıkalyq jumystar kúsheıtildi.
Qutqarýshylar úılerdi aralap, peshterdi, murjalardy jáne elektr qurylǵylaryn qaýipsiz paıdalaný talaptaryn túsindirip jatyr.
- Ótken jylytý maýsymynda óńir boıynsha 460 órt tirkelse, onyń 341-i turǵyn úı sektorynda bolǵan. Jer úılerdegi órt saldarynan 22 adam qaza boldy. Mamandar qaıǵyly jaǵdaılarǵa negizinen ot jaǵý kezindegi salaqtyq, mas kúıde tósekte temeki shegý jáne peshterdi paıdalaný talaptarynyń buzylýy sebep bolyp otyrǵanyn aıtady, - deıdi ShQO TJD Memlekettik órt baqylaý basqarmasynyń bastyǵy Nurjan Ómirjanov.
Jylytý maýsymynda kómirtegi totyǵynan ýlaný qaýpi de artady. Jyl basynan beri oblysta 21 adamǵa ıis tıgen.
Qaýiptiń aldyn alý úshin úılerge ýly gazdy anyqtaıtyn datchıkterdi ornatý jumystary jalǵasyp jatyr. Ásirese áleýmettik turǵyda osal sanattaǵy azamattardyń baspanalaryna basymdyq berilgen.
Sońǵy alty jylda oblysta osyndaı 17 myńnan astam datchık ornatyldy.
Eske salsaq, osyǵan deıin Astanada qysqy jylytý maýsymyna jylý qory daıyn ekendigin jazǵanbyz.
