Shyǵys Qazaqstandaǵy jaıylym tapshylyǵy máselesi sheshile me

ÓSKEMEN. KAZINFORM — Shyǵys Qazaqstan oblysynda aýyl turǵyndaryn jaıylymmen qamtamasyz etý boıynsha qandaı jumystar atqarylyp jatqany belgili boldy.

ShQO jer qatynastary basqarmasynyń basshysy Nadejda Mıheılıstiń aıtýynsha, 2022 jyldan beri memleketke qaıtarylǵan jerlerdiń 131,6 myń gektary aýyl sharýashylyǵy aınalymyna engizildi. 

— Bul jalpy kólemniń shamamen 28%-yn quraıdy. Onyń ishinde 53,6 myń gektary halyqtyń qajettiligi úshin berilse, 78 myń gektary konkýrs negizinde aýyl sharýashylyǵy salasymen aınalysatyndarǵa usynylǵan. 2026 jyldyń birinshi jartyjyldyǵynda qosymsha 293 myń gektar jerdi aınalymǵa engizý josparlanyp otyr, — deıdi ol.

Sonymen qatar óńirde qoǵamdyq jaıylymdardy qalyptastyrý jumystary júrgizilip jatyr. Qalalar men aýdandardyń ákimdikteri aýyl sharýashylyǵy janýarlarynyń sanyn eskere otyryp, qajetti jaıylym kólemin anyqtap, jaıylymdardy basqarýdyń bes jyldyq josparlaryn ázirledi.

— Máselen, mundaı jospar Altaı aýdanynda bekitilgen. Al basqa qalalar men aýdandarda qujattar bekitý satysynda. Jalpy alǵanda, óńirde halyqtyń malyn jaıýǵa arnalǵan qoǵamdyq jaıylymdardyń kólemi shamamen 700 myń gektardy quraıdy, — deıdi Nadejda Mıheılıs.

Budan bólek, oblysta aýyl sharýashylyǵy jerleriniń topyraq qunarlylyǵyn qalpyna keltirý boıynsha óńirlik jol kartasy júzege asyrylyp keledi. Mamandar tozǵan jerlerdi anyqtaý jumystaryn qolǵa alǵan. Búgingi kúni osyndaı 305,9 myń gektar jer anyqtaldy.

Eske salsaq, osyǵan deıin Almaty oblysynda 150 myń gektar jer memleket menshigine qaıtarylǵany habarlanǵan.