Shyǵys Qazaqstandaǵy jaǵajaılar shomylý maýsymyna qanshalyqty daıyn

Sý túbi laılanǵan

Tamyljyǵan tabıǵaty bar Shyǵys óńiri ózen-kólge de baı. Eldegi sý resýrstarynyń shamamen 40%-y osy oblysta shoǵyrlanǵan. Sondyqtan da jaz shyqqanda Qazaqstannyń ár túkpirinen demalýshylar osynda aǵylady. Sonyń biri Aısulý esimdi Almaty qalasynyń turǵyny.

- Ózim muǵalim bolyp jumys isteımin. Jazǵy kanıkýl saıyn Shyǵys Qazaqstandaǵy týystaryma qonaqqa kelýge tyrysamyn. Sibe kólderine, Buqtyrma ózenine baryp kórdim. Óte qatty unady. Bıyl jazda Samar aýdanyndaǵy Sarybel jaǵajaıyna barýdy josparlap otyrmyz, - deıdi ol.

Óskemende turatyn Baqtııar Muhamedov bolsa, qaladan shyqpaı-aq sýǵa shomylatynyn aıtty.

- Negizinen «Kotlovan» jaǵajaıyna baryp turamyn. Al «Samal» saıabaǵyndaǵy sýdyń aǵyny tym qatty. Ári sýy da salqyn. Sondyqtan ol jaqqa kóp bara bermeımin, - deıdi qala turǵyny.

Jalpy Óskemende buǵan deıin shomylýǵa arnalǵan 3 jer bolǵan. Biraq Sol jaǵalaý saıabaǵynda ornalasqan «Kógildir kólder» jaǵajaıynda sýǵa túsýge tyıym salyndy.

- Jaǵajaı resmı túrde jabyldy. Endi tıisti eskertý belgileri ornatylady jáne kúzetshiler kezekshilik etedi. Shomylýǵa tyıym salý týraly sheshim qabyldanýynyń negizgi sebebi - sý qoımasynyń nashar jaǵdaıy men túbiniń laı bolýy. Dese de saıabaqqa kelýshiler qaıyqpen júzip, katamaranmen serýendeı alady, - dep habarlady Sol jaǵalaý saıabaǵynan.

Al qalǵan eki jaǵajaıdyń jaǵdaıy qalaı ekendigin ShQO Týrızm basqarmasynan bilip kórdik.

- Bıyl «Samal» saıabaǵyn abattandyrýǵa 500 mln teńge bólingen. Sonyń sheńberinde jaǵajaı aýmaǵyn sanıtarlyq tazalaý jumystary júrgizildi. Aldaǵy ýaqytta oryndyqtar, beınebaqylaý kameralary, sýǵa qaýipsizdik belgilerin ornatý, sanıtarlyq toraptar men dýsh kabınalaryn jóndeý jáne qutqarýshylar shtatyn jasaqtaý josparlanyp otyr. Sonymen qatar jaǵajaı aýmaǵyndaǵy sý aǵysynyń qarqynyn báseńdetý maqsatynda gıdrotehnıkalyq jumystar júrgizý kózdelgen, - deıdi basqarma basshysy Erjan Sembınov.

Ótken jyly «Kotlovan» jaǵajaıynda jol ınfraqurylymyn jaqsartý jumystary júrgizilip, 140 oryndyq avtoturaq uıymdastyryldy. Jaryq tartylyp, sýmen jabdyqtalyp, jaǵajaıǵa qum tóseldi.

- Bıyl bul demalys ornyn abattandyrýǵa 70 mln teńge qarastyrylǵan. Oǵan shomylýǵa arnalǵan pontondyq konstrýktsııa, oryndyqtar, shatyrlar, jatyn oryndyqtar, qoqys jáshikteri men sanıtarlyq toraptar ornatý kózdelgen. Alaıda beınebaqylaý kameralaryn, qatty turmystyq qaldyqtarǵa arnalǵan konteınerlerdi, dýsh kabınalaryn, qutqarý beketteri men medıtsınalyq kómek pýnktterin ornatý máseleleri áli pysyqtalmaǵan, - deıdi basqarma basshysy.

Resmı túrde alǵash ret ashylady

«Kotlovan» jaǵajaıy Óskemen qalalyq Turǵyn úı-kommýnaldyq sharýashylyq bóliminiń balansynda. Sondyqtan jaǵajaıda bıyl qandaı ózgeris bolatynyn solardan bilip kórdik.

- Bıyl «Kotlovan» alǵash ret resmı túrde ruqsat etilgen demalys aımaǵy retinde ashylaıyn dep otyr. Qazirgi ýaqytta daıyndyq jumystary júrgizilip jatyr. Ony 15 maýsymǵa deıin aıaqtaý josparlanǵan. Jaǵajaı tańǵy 8.00-den keshki 20.00-ge deıin jumys isteıdi. Túnde shomylýǵa tyıym salynady. Jaǵajaıǵa kúzet qoıylady, - dep jaýap berdi bólimnen.

Al jalpy Shyǵys Qazaqstanda bıyl jazda 20-dan astam jaǵajaı jumys isteıdi. ShQO Tótenshe jaǵdaılar departamentiniń málimetine súıensek, eń kóp jaǵajaı Ulan aýdanynda. Onda sýǵa shomylýǵa bolatyn 8 ýchaske bar.

– Oblys ákimdiginiń qaýlysyna sáıkes óńirde shomylýǵa bolatyn 23 ýchaske belgilendi. Onyń ishinde 9 kommýnaldyq, 8 jeke, 1 mýnıtsıpaldy jaǵajaı. Óńir boıynsha sýdaǵy qaýipsizdikti qamtamasyz etý maqsatynda 5 qutqarý bólimshesi jumys isteıdi. Sondaı-aq bıylǵy shomylý maýsymynda Samar aýdanynyń Sarybel aýyldyq okrýginde jyljymaly qutqarý beketin iske qosý josparlanǵan, - deıdi departament bastyǵy Rashıd Blıalov.

Qutqarýshylarǵa sý aıdyndarynyń túbin tekserý úshin súńgýirlik jumystar júrgizýge 16 ótinim kelip túsken. Tekserý aıaqtalǵannan keıin ǵana daıyndyq aktisi beriledi.

Shomylý maýsymy kezinde jazataıym oqıǵalardyń aldyn alý maqsatynda TJD qyzmetkerleri, polıtseıler men jergilikti atqarýshy organ ókilderi birlesken reıdter júrgizedi. Kóbine buzylatyn sýdaǵy qaýipsizdik erejeleri kelesideı:

- jabdyqtalmaǵan jerde shomylý;

- balalardyń eresekterdiń qaraýynsyz sýdyń janynda bolýy;

- mas kúıde shomylý;

- júzý quraldaryn paıdalaný kezinde qaýipsizdik talaptaryn saqtamaý.

2026 jyldyń basynan beri sýda 3 jazataıym oqıǵa tirkelgen.

Buqtyrmada qandaı ózgeris bolady?

Osy jyly Óskemen irgesindegi Ulan aýdanyndaǵy Shalqar kóli jaǵalaýyn abattandyrý jumystary jalǵasyn tappaq. Ótken jyly 100 oryndyq avtoturaq aımaǵy keńeıtilip, kireberis joldar asfalttalyp, 5 kabınaly sanıtarlyq-gıgıenalyq torap ornatylǵan bolatyn. Sonymen qatar 150 tekshe metr qum jetkizilip, qoqys konteınerlerine arnalǵan alańdar jabdyqtalǵan.

Al bıyl 132 mln teńge bólinip, jaǵajaı aýmaǵyn 1 gektarǵa deıin keńeıtý, medıtsınalyq pýnkt ornatý, jaǵalaý men sýdy qamystan tazartý, fýd-aımaqtardy jaılastyrý, shezlongtar men dýsh kabınalaryn ornatý kózdelgen.

- Buzý jáne qurylys jumystarynyń júrgizilýine baılanysty jaǵajaıdy jańǵyrtý osy jyldyń tamyz aıynda aıaqtalady. Osy ýaqytqa deıin jaǵajaıǵa kelýshiler úshin jabyq bolady. Al Altaı aýdanyndaǵy Jańa Buqtyrma kentinde kásipkermen jasalǵan memorandým sheńberinde jaǵajaı ınfraqurylymyn jaqsartý jumystary aıaqtalýǵa jaqyn. Oryndyqtar, aqparattyq stendter, qutqarý munarasy jáne qaldyqtarǵa arnalǵan konteınerler ornatyldy. Sý men topyraq sapasyna synamalar alyndy, - dep habarlady ShQO Týrızm basqarmasynan.

Kentte demalys bazalaryna aparatyn aınalma jol salynǵan. Alda Arbat salý jáne jaǵajaıdy qaıta jańǵyrtý jumystary kózdelgen. Joba qazirgi ýaqytta túzetýden ótip jatyr. Ony iske asyrýǵa qarjy áli bólingen joq.

- Sonymen qatar Buqtyrma sý qoımasynyń jaǵalaý aýmaǵyna arnalǵan Bas jospar ázirlenip jatyr. Jańa Buqtyrma kenti óńirdegi jazǵy jaǵajaı týrızminiń negizgi aımaǵy mártebesin saqtap otyr. Ondaǵy týrıstik nysandarda ınfraqurylym máseleleri bar. «KEMONT» AQ-nyń elektr berý jelileri arqyly demalys bazalarynyń kóp bóligi elektrmen jabdyqtalady, - delingen aqparatta.

Eske salsaq, osyǵan deıin ІІM shomylý maýsymynda qaýipsizdik talaptaryn qatań saqtaýǵa shaqyrǵany habarlanǵan.