Shyǵys Qazaqstandaǵy tasjoldardyń biri kóliktiń barlyq túri úshin jabylady

ÓSKEMEN. KAZINFORM – Shyǵys Qazaqstan oblysynda qar kóshkini túsiriletindikten joldardyń biri jabylmaq.

ShQO Tótenshe jaǵdaılar departamenti baspasóz qyzmetiniń málimetine súıensek, 6 naýryz saǵat 10.00-den bastap oblystyq mańyzy bar tasjoldardyń birinde profılaktıkalyq qar kóshkini túsiriledi.

— Soǵan baılanysty Óskemen-Tarǵyn-Samar tasjolynyń 95-102 shaqyrymynda kóliktiń barlyq túriniń qozǵalysyna tyıym salynady. Kólik júrgizýshilerin óz marshrýttaryn aldyn ala josparlap alýdy suraımyz, — delingen aqparatta.

Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi. 

Eske salsaq, buǵan deıin Almatyda laı kóshkini qaýpi bar ýchaskeler nyǵaıtylyp jatqany habarlanǵan.