Shyǵys Qazaqstandaǵy taǵy eki aýdanda jumys ýaqyty 1 saǵatqa keri shegerildi
ÓSKEMEN. KAZINFORM – Shyǵys Qazaqstan oblysyndaǵy Marqakól jáne Úlken Naryn aýdandarynda jumys ýaqyty 1 saǵatqa keri shegerildi.
24 aqpannan bastap Marqakól jáne Úlken Naryn aýdandarynda óńirdiń tabıǵı jaǵdaılaryna beıimdelgen jańa jumys ýaqyty engizildi. Endi jumys kúni saǵat 08:00-de bastalyp, 17:30-da aıaqtalady, túski úzilis 12:00-den 13:30-ǵa deıin.
- Bul ózgerister tańnyń erte atýy men keshki batýymen baılanysty. Osylaısha, turǵyndarǵa kúndizgi ýaqytty tıimdirek paıdalanýǵa múmkindik beriledi. Sheshim jurtshylyqpen talqylanǵannan keıin qabyldandy. Sondaı-aq oblystyq basqarma basshylarynan quralǵan mobıldi top bul bastamany jer-jerde talqylady, - dep habarlady aýdan ákimdikterinen.
Aıta keteıik, buǵan deıin mundaı ózgeris Katonqaraǵaı aýdanynda engizilgen. Qazir ondaǵy 40 mekeme aptasyna bes kún saǵat 08:00-den 17:30-ǵa deıin jumys isteıdi.