Shyǵys Qazaqstandaǵy ózenderde sý deńgeıi qaýipti shekten asqan joq

ÓSKEMEN. KAZINFORM — Shyǵys Qazaqstan oblysynda kóktemgi sý tasqynynyń aldyn alý úshin táýlik boıy monıtorıng júrgizilip jatyr. 

ShQO tótenshe jaǵdaılar departamenti baspasóz qyzmetiniń málimetine súıensek, óńir boıynsha aýa temperatýrasy jylynyp, qar qarqyndy erı bastady.

— Qutqarýshylar ózenderdiń muzdan ashylý barysyn baqylap, sý tasqyny qaýpi bar ýchaskelerdi ushqyshsyz ushý apparattaryn paıdalana otyryp tekserip jatyr. Atalǵan jumystar sý tasqynyna qarsy is-sharalardyń tıimdiligin baǵalaýǵa, tasqyn qaýpi týyndaǵan jaǵdaıda ýaqtyly sharalar qabyldaýǵa baǵyttalǵan. Baqylaý nátıjeleri boıynsha gıdrologııalyq jaǵdaı turaqty ekeni anyqtaldy, — dep habarlady vedomstvo ókilderi. 

Oblystyń kóptegen ózeninde muzdyń erigeni baıqalady. Sý deńgeıiniń qaýipti shekke deıin kóterilý faktisi tirkelgen joq.

Aıta keteıik, oblysta 8,5 myń adam turatyn 71 eldi mekende sý tasqyny qaýpi bar. Sý tasqynyna qarsy is-sharalardyń nátıjesinde 16 eldi mekende sý basý qaýpi joıyldy, 50 aýylda azaıtyldy, 5 eldi mekende áli saqtalyp otyr.

Eske salsaq, osyǵan deıin Batys Qazaqstanda qar kúrt erip, joldy buzyp ketkeni habarlanǵan.