Shyǵys Qazaqstandaǵy mektep avtobýstarynyń jartysynan astamy eskirgen
ÓSKEMEN. KAZINFORM – Shyǵys Qazaqstan oblysyndaǵy mektep avtobýstarynyń jartysynan astamy aýystyrýdy qajet etedi.
ShQO bilim basqarmasynyń málimetine súıensek, búginde óńirdegi 102 bilim ordasynda oqýshylardy tasymaldaıtyn 126 avtobýs bar. Sońǵy jyldary avtopark kezeń-kezeńimen jańartylyp, 2020 jyldan beri 28 jańa avtobýs satyp alynǵan. Onyń 12-si sońǵy úsh jylda alyndy.
Soǵan qaramastan, qoldanystaǵy avtobýstardyń edáýir bóligi uzaq jyldar boıy paıdalanylyp keledi. 2000-2015 jyldar aralyǵynda satyp alynǵan ári paıdalaný merzimi normatıvten asyp ketken 68 mektep avtobýsy aýystyrýdy qajet etedi.
- Qazirgi ýaqytta mektep avtobýstary parkin lızıng tetigi arqyly jańartý múmkindigi qarastyrylyp jatyr. Aldyn ala esep boıynsha, bul máseleni sheshýge shamamen 3 mlrd teńge qajet, - delingen aqparatta.
Eske salsaq, osyǵan deıin Óskemende avtobýs jolaqysy qyrkúıekten bastap ózgerýi múmkindigi jaıly jazǵanbyz.
