Shyǵys Qazaqstandaǵy gıdrobeketterde sý deńgeıi qaýipti mejeden tómen
ÓSKEMEN. KAZINFORM – Shyǵys Qazaqstan oblysyndaǵy ózenderde sý deńgeıi qaýipti shekten tómen.
«Qazgıdromed» RMK oblystyq fılıalynyń málimetinshe, óńirdiń birqatar aýdanynda qar qorynyń kólemi kópjyldyq ortasha kórsetkishten joǵary. Atap aıtqanda, Zaısan aýdanynda qar qory 129 mm-di qurap, qalypty mólsherden eki eseden asqan. Al Úlken Naryn aýdanynda – 119 mm (norma – 74 mm), Tarbaǵataı aýdanynda – 54 mm (norma – 43 mm), Marqakól aýdanynda – 221 mm (norma – 207 mm).
- Altaı, Samar, Shemonaıha, Katonqaraǵaı, Glýbokoe, Kúrshim aýdandary men Rıdder qalasynda qar qory kópjyldyq normadan da, ótken jylǵy deńgeıden de tómen. Muz qabaty Tarbaǵataı aýdanyndaǵy Tuǵyl aýylynda 14 mm, Marqakól aýdanynda 11 mm, Úlken Naryn men Shemonaıha aýdandarynda 0,4 mm-den tirkelgen, - delingen aqparatta.
Topyraqtyń qatý tereńdigi 15 sm-den 86 sm-ge deıin jetedi. Eń joǵary kórsetkish Úlken Naryn aýdanynda – 86 sm.
- Gıdrologııalyq jaǵdaı turaqty. Barlyq gıdrobeketterde sý deńgeıi qaýipti mejeden tómen. Óńirdegi ózenderdiń basym bóliginde muz álsirep, keıbirinde muz sógile bastaǵan. Buqtyrma sý qoımasyndaǵy muzdyń qalyńdyǵy 49 sm-den 81 sm-ge deıin jetedi, - delingen habarlamada.
Eske salsaq, osyǵan deıin Batys Qazaqstanda qar kúrt erip, joldy buzyp ketkeni habarlanǵan.
