Shyǵys Qazaqstandaǵy gıdrobekette sý deńgeıi kóterilip ketti

ÓSKEMEN. KAZINFORM – Shyǵys Qazaqstan oblysyndaǵy gıdrobekette sý deńgeıi kóterilip ketti.

Oblys ákimdiginiń málimetine súıensek, mamyrdyń 15-22 aralyǵynda QHR Shyńjań-Uıǵyr avtonomııalyq aýdanynda Nanvan gıdrobeket mańynda sý deńgeıi kóterilgen. 21 mamyr saǵat 20:00-degi jaǵdaı boıynsha sýdyń shyǵyn kólemi 2070 m3/s quraǵan.

Osyndaı jaǵdaı budan buryn 2013 jáne 2016 jyldary tirkelgen. Bul aýmaqta aǵyp jatqan Býyrshyn ózeni transshekaralyq Qara Ertis ózenine, al Qara Ertis Zaısan ózenine quıady. Marqakól aýdanynyń Boran aýylynda ornalasqan gıdrobekettegi kórsetkish boıynsha Qara Ertis ózeniniń deńgeıi 543 sm qurap otyr. Bul qaýipti deńgeıden 18 sm-ge joǵary.

«Qazirgi tańda Shyǵys Qazaqstan oblysy ákimdigi jáne TJD jaǵdaıdy baqylaýǵa alyp, shuǵyl sharalar qoldaný ústinde. Jergilikti jerde atqarýshy bılik, polıtsııa jáne prokýratýra organdary aldyn ala eskertildi. Aýyldyń tómengi tusynda ótken jyly uzyndyǵy 400 metr, al bıiktigi 675 sm bolatyn bóget salynǵan. Bógettiń bıiktigi qazirde qaýipti deńgeıden 1,5 metr joǵary bolǵandyqtan, áli de 70 sm-ge jýyq aralyq bar», - delingen habarlamada.

Qara Ertis ózeniniń deńgeıi ár 4 saǵat saıyn ólshenip, táýlik boıy baqylaý uıymdastyryldy. Aýyl mańyndaǵy uzyndyǵy 60 metr bolatyn bógetti kúsheıtý jumystary júrgizilýde. Eldi meken turǵyndary eskertilip, tótenshe jaǵdaı týyndasa olardy ýaqytsha ornalastyrý oryndary ázirlendi. Ázirge bógetti kúsheıtý jumystaryna 11 adam jáne 7 tehnıka tartylǵan.

«Boran aýylyna jaqyn mańdaǵy Tarbaǵataı, Zaısan, Kúrshim jáne Úlken Naryn aýdandarynan qosymsha tehnıka men mamandar jumyldyrylýda. Eldi mekenderge tónip turǵan qaýip joq. Jaǵdaı baqylaýda», - delingen aqparatta.