Shyǵys Qazaqstandaǵy barlyq qala, aýdan búgin jumysty saǵat 8-den bastady

ÓSKEMEN. KAZINFORM – Shyǵys Qazaqstan oblysy tolyqtaı jańa jumys kestesine aýysty.

Búginnen bastap óńirdegi memlekettik mekemeler, bıýdjettik uıymdar, kásiporyndar jáne áleýmettik qyzmetter túgeldeı jumys ýaqytyn saǵat 08:00-den bastady. Keshke jumys saǵat 17:30-da deıin sozylady. Al túski úzilis 12:00-den 13:30-ǵa deıin belgilengen. Bul jańashyldyq kúndizgi jaryqty tıimdi paıdalaný men eńbek ónimdiligin arttyrýǵa baǵyttalǵan.

- 2024 jyly Qazaqstanda birtutas UTC+5 ýaqyt beldeýine kóshý bastamasy qyzý talqylandy. Bul usynys ásirese Shyǵys Qazaqstan oblysy men Almaty qalasynda qyzý talqylandy. Óńir turǵyndary bul másele boıynsha óz pikirlerin bildirdi. Nátıjesinde, Úkimet halyqtyń pikirin eskere otyryp, ár óńirge jumys kestesin jergilikti erekshelikterge qaraı retteýge múmkindik berý týraly sheshim qabyldady. Mundaı tásil ár aımaqtyń qajettilikterin eskerýge jáne sheshimdi neǵurlym ıkemdi ári yńǵaıly etýge múmkindik berdi, - dep habarlady oblys ákimdiginen.

Shyǵys Qazaqstandaǵy jaǵa jumys kestesine kóshý kezeńderi kelesideı órbidi:

• Katonqaraǵaı aýdany 2025 jyldyń qańtar aıynyń basynda osy ózgeristerdi birinshi bolyp engizdi.

• Marqakól jáne Úlken Naryn aýdandary 24 aqpanda bastamany qoldady.

• Zaısan, Kúrshim, Tarbaǵataı jáne Samar aýdandary 5 naýryzdan bastap jańa kestege kóshti.

• Altaı jáne Ulan aýdandary 12 naýryzda ózgeristerdi engizdi.

• Glýbokoe jáne Shemonaıha aýdandary 13 naýryzda jumys ýaqytyn bir saǵatqa shegerdi.

• Rıdder qalasy 14 naýryzdan bastap jańa kestege kóshti.

• Óskemen 20 naýryzdan osy jańashyldyqqa bet burdy.

Jańa jumys kestesin engizý aldynda ár qala, aýdanda halyqpen kezdesýler ótken. Kópshilik jumys kúniniń erte bastalýyn qoldady.

Aıta ketý kerek, mektepter, balabaqshalar jáne medıtsınalyq mekemelerdiń jumys kestesi ózgergen joq. Sebebi olar buǵan deıin de osyǵan uqsas tártippen jumys istegen.

Eske salsaq, buǵan deıin Óskemende jumys ýaqyty 1 saǵatqa shegerilgenin habarlaǵan edik.