Shyǵys Qazaqstandaǵy 300-den astam ýchaskede qar kóshkini júrý qaýpi bar
ÓSKEMEN. KAZINFORM – Shyǵys Qazaqstan oblysynda qar kóshkini qaýpi joǵary kezeń bastaldy.
«Qazseldenqorǵaý» mekemesi ShQO fılıaly qyzmet kórsetetin aýmaqta qar kóshkini júrý qaýpi bar 325 ýchaske ornalasqan. Olardyń boıynda 93 shaqyrym avtokólik joly, mereke jáne demalys kúnderi demalýshylar sany 3000 adamnan asatyn týrıstik jáne shańǵy bazalary bar.
– Mamandar 20 qar kóshkini marshrýttaryn ázirledi. Olarǵa 160 qar ólsheýish taqtaıshalar ornatylǵan. Qar kóshkini jınaqtalatyn ýchaskelerdiń jalpy jaı-kúıin, qar kóshkini júrý qaýpiniń bar-joǵyn, qar massasynyń jınalý deńgeıin anyqtaý maqsatynda kóshkin júrý qaýpi bar ýchaskelerge apta saıyn tekserý júrgiziledi. Demalys aımaqtarynda, shańǵy bazalarynda jáne avtokólik joldarynyń boıynda 40 eskertý qalqany ornatyldy, – delingen fılıal aqparatynda.
Ótken jyly qar kóshkininiń aldyn alý maqsatynda 14 profılaktıkalyq kóshkin júrgizilip, nátıjesinde jalpy kólemi 5231 tekshe metr qar túsirildi.
«Taýly aımaqtarǵa shyǵar aldynda aýa raıy jaǵdaıymen mindetti túrde tanysý qajet. «112» qyzmetinen daýyldy eskertý alǵan jaǵdaıda táýekelge barmaı, qar kóshkini qaýpi bar marshrýttarmen júrmeýge shaqyramyz», – dep eskertti ShQO TJD tótenshe jaǵdaılardyń aldyn alý basqarmasynyń bastyǵy Anýar Qaısanov.
Eske salsaq, buǵan deıin ShQO-da respýblıkalyq mańyzy bar joldyń bir bóligin tas kóshkini basyp qalǵany habarlanǵan.