Shyǵys Qazaqstandaǵy 3 sý qoımasy apatty jaǵdaıda tur

ÓSKEMEN. KAZINFORM – Shyǵys Qazaqstan oblysyndaǵy 7 sý qoımasy jańǵyrtylady.

Óńirlegi gıdrotehnıkalyq qurylystardyń jaı-kúıine baqylaý kúsheıtildi. Oblystyq máslıhattyń otyrysynda 3 sý qoımasy resmı túrde apatty jaǵdaıda dep tanylǵan. Al bulardan basqa 7 sý qoımasy aýyl sharýashylyǵy alqaptaryn sýarý maqsatynda birinshi kezekte jańǵyrtylatyn boldy.

ShQO Tabıǵı resýrstar jáne tabıǵat paıdalanýdy retteý basqarmasynyń málimetinshe, «Shyǵys sý qoımalary» KMK-nyń balansynda 34 gıdrotehnıkalyq nysan bar.

- Apatty jaǵdaıdaǵylardyń qatarynda Qandysý, Úıdene jáne Orta Terekti sý qoımalary bar. Bul jerlerge oblys bıligi nysandyq sıpattaǵy tótenshe jaǵdaı rejımin engizgen. Sý qoımalaryn qalpyna keltirýge arnalǵan jobalyq-smetalyq qujattamany daıyndaýǵa qarjy qarastyrylǵan. Alaıda olardyń ishindegi tek Orta Terekti sý qoımasy ǵana kommýnaldyq menshikke jatady. Qalǵan ekeýi respýblıkalyq vedomstvolardyń qaraýynda, - deıdi basqarma basshysy Arman Esentaev.

Eske salsaq, osyǵan deıin ShQO-daǵy 17 jaǵajaıda qaýipsizdik talaptary saqtalmaǵany habarlanǵan.