Shyǵys Qazaqstandaǵy 21 aýyl turǵyndary ishimdikten bas tartty

ÓSKEMEN. KAZINFORM — Shyǵys Qazaqstan oblysyndaǵy 21 aýyl halqy salaýatty ómir saltyn qoldap, ishimdikten bas tartty.

Tarbaǵataı aýdanyna qarasty Jańaaýyl aýylynyń turǵyndary eldi mekendi «araq ishpeıtin aýyldar» qataryna engizý jóninde biraýyzdan kelisimge keldi. 

— Araqtan bas tartý — bul tyıym emes, otbasyndaǵy tynyshtyqty, qoǵamdaǵy qaýipsizdikti jáne óskeleń urpaqtyń jarqyn bolashaǵyn qamtamasyz etýge baǵyttalǵan sanaly tańdaý, — dedi olar.

Atalǵan bastamany aqsaqaldar keńesi, Analar keńesi, dinı birlestik ókilderi, bilim berý salasynyń jáne quqyq qorǵaý organdarynyń qyzmetkerleri qoldady.

Polıtseıler turmystyq quqyqbuzýshylyqtardyń basym bóligi mas kúıde jasalatynyn aıtyp, aldyn alý jumystarynyń mańyzdylyǵyna toqtaldy.

Qazirgi tańda Jańaaýyl aýylynda 661 turǵyn bar. Q.Aqynov atyndaǵy orta mektepte 83 oqýshy bilim alady. Osylaısha, Jańaaýyl Shyǵys Qazaqstan oblysy boıynsha «Araq ishpeıtin aýyldar» bastamasyna resmı túrde qosylǵan 21-shi eldi meken bolyp otyr.

Eske salsaq, osyǵan deıin Abaı oblysynda taǵy bir aýyl ishimdikten bas tartqany jaıly jazǵanbyz.