Shyǵys Qazaqstandaǵy 11 aýylda sel júrý qaýpi bar
ÓSKEMEN. KAZINFORM – Shyǵys Qazaqstan oblysynda sel qaýpi joǵary kezeń áli jalǵasyp jatyr.
ShQO Tótenshe jaǵdaılar departamentiniń málimetinshe, óńir boıynsha sel qaýpi Zaısan, Altaı, Katonqaraǵaı aýdandary men Rıdder qalasy aýmaǵynda ornalasqan 13 ózen basseıninde tirkelgen. Atalǵan aýmaqtaǵy 144 morenalyq kól 13 seldiń qalyptasý oshaǵyn quraıdy jáne ol 11 eldi mekenge qaýip tóndirýi múmkin.
Sel uzaq ýaqytqa sozylǵan nóser jaýyn-shashynnan keıin nemese kúshti jer silkinisi kezinde ǵana júrýi yqtımal.
- Oblysta syrǵyma qaýpi bar ýchaskeler sırek kezdesedi. Barlyǵy 9 ýchaske anyqtalǵan. Olardyń basym bóligi – ózen jaǵalaýlarynyń tik jarqabaqtary men avtokólik joldary boıyndaǵy taý betkeıleriniń oıylǵan bólikteri. Bul ýchaskeler Altaı, Katonqaraǵaı, Zaısan aýdandary men Rıdder qalasy mańyndaǵy Gromotýha, Úlbi, Chernovaıa, Hamır, Buqtyrma jáne Kendirlik ózenderiniń basseınderinde ornalasqan, - delingen aqparatta.
Sel qaýpi kezeńi bastalǵaly beri 9 maýsymdyq gıdrobeket jáne Katonqaraǵaı aýdanyndaǵy Sarymsaqty ózeninde 1 jyl boıy jumys isteıtin gıdrobeket bar. Kún saıyn táýligine úsh ret barlyq gıdrobeketten sel qaýpi bar ýchaskelerdegi gıdrometeorologııalyq jaǵdaı týraly aqparat beriledi.
Jalpy, sel qaýpi joǵary kezeńniń basynan 69 jerústi sel qaýpi bar ýchaskege jáne 45 syrǵyma qaýpi bar ýchaskege tekserý júrgizildi. Jaǵdaı turaqty, qandaı da bir qaýip anyqtalǵan joq.
Eske salsaq, osyǵan deıin tas kóshkinine tap bolǵan týrıst tikushaqpen evakýatsııalanǵany habarlanǵan.
