Shyǵys Qazaqstanda joldy sý shaıyp ketti

ÓSKEMEN. KAZINFORM – Shyǵys Qazaqstan oblysyndaǵy «Óskemen-Altaı» tasjolynyń ýchaskesin sý shaıyp ketti.

ShQO Polıtsııa departamenti baspasóz qyzmetiniń málimetine súıensek, tasjoldardyń birinde kólik qozǵalysyna tyıym salyndy.

- «Óskemen-Altaı» tasjolynyń 56-shaqyrymynda jol jamylǵysyn sý shaıyp ketti. Osyǵan baılanysty barlyq kólik túrleri úshin qozǵalys ýaqytsha toqtatyldy. Qazirgi ýaqytta oqıǵa ornynda patrýldik polıtseıler jumys isteýde. Olar jol qozǵalysynyń qaýipsizdigin qamtamasyz etip, qoǵamdyq tártipti qadaǵalaýda, - delingen aqparatta.

Osy rette, tártip saqshylary oblys turǵyndaryna qalyptasqan jaǵdaıǵa túsinistikpen qarap, qaýipsizdik sharalaryn saqtaýdy surady.

Eske salsaq, osyǵan deıin Semeıde joldan ótpek bolǵan áıeldi poıyz basyp ketkeni habarlanǵan.