Shyǵys Qazaqstanda jol apatynan eki adam kóz jumdy
ÓSKEMEN. KAZINFORM – Shyǵys Qazaqstan oblysynda eki kólik soqtyǵysyp, 2 adam kóz jumdy.
ShQO polıtsııa departamenti baspasóz qyzmetiniń málimetine súıensek, jol-kólik oqıǵasy 24 sáýirde «Óskemen-Shemonaıha» tasjolynyń Glýbokoe aýdanyndaǵy Berezovka aýylynyń mańyndaǵy ýchaskesinde bolǵan.
– «Mazda» jáne «JAC» avtokólikteri soqtyǵysty. Sonyń saldarynan «Mazda» júrgizýshisi men jolaýshysy sol jerde qaza boldy. Al «JAC» júrgizýshisi aýrýhanaǵa jatqyzyldy, - dep habarlady vedomstvo ókilderi.
Qazirgi ýaqytta tártip saqshylary oqıǵanyń barlyq mán-jaıyn anyqtaý úshin tıisti tergeý sharalaryn júrgizip jatyr. Qylmystyq is qozǵalyp, birqatar saraptama taǵaıyndalǵan.
Eske salsaq, osyǵan deıin Oralda avtokólik órtenip, 16 jastaǵy jasóspirim kúıik jaraqatyn alǵany habarlanǵan.
