Shyǵys Qazaqstanda jylý ortalyqtarynyń qysqa daıyndyǵy - 82 paıyz

Shyǵys Qazaqstan oblysyndaǵy jylý elektr ortalyqtarynyń jylytý maýsymyna daıyndyǵy 82,3 paıyzdy qurap otyr, dep habarlaıdy QazAqparat tilshisi.

ShQO qurylys, energetıka jáne turǵyn úı-kommýnaldyq sharýashylyq basqarmasynyń málimetine súıensek, búginde óńir boıynsha barlyq JEO-lardyń jylytý maýsymyna daıyndyǵy 82,3%-dy qurady.

Onyń ishinde qazandyqtar  76,6%, týrboagregattar - 91,3% daıyn.

«Gıdroelektrostantsııalarda jóndeý jumystary 87,7% aıaqtaldy. Sonymen qatar oblystaǵy 32 ortalyqtandyrylǵan qazandyqtar – 89%, jylýmen jabdyqtaý jelileri – 98,9% daıyn. Kóppáterli turǵyn úılerge qatysty aıtar bolsaq, olardyń 97,5%, bıýdjettik uıymdar 100% daıyndaldy. Jylý jelilerin tehnıkalyq tekserý tolyǵymen aıaqtaldy. Osy jyly Óskemen qalasy men Glýbokoe kentiniń 12,9 shaqyrym jylý jelilerin qaıta jańartý jáne salý boıynsha 4 joba iske asyryldy», - deıdi basqarma basshysy Dıdar Keńesbaev.

Osy rette Rıdder JEO men qalanyń jylý jelilerin jóndeý jumystary erekshe baqylaýda. Bıyl osy maqsattarǵa 8 mlrd 945 mln teńge bólingen.

«Jylytý maýsymyna ýaqtyly daıyndalý úshin jergilikti atqarýshy organ ókilderi kúrdeli jóndeýden keıin qazandyq agregattaryn iske qosyp kórýde. Soǵan sáıkes 15 qyrkúıekten bastap Rıdderdegi № 1,2,3 qazandyq agregattaryn jýý jáne gıdravlıkalyq synaqtan ótkizý jumystary bastaldy. Osylaısha, jylytý maýsymynyń basynda osy 3 qazandyq tolyq daıyn bolady», - deıdi D.Keńesbaev.

Budan bólek, №4 qazandyq agregaty 15 qazanǵa deıin, №5 qazandyq 20 qazanǵa deıin, №6 qazandyq 15 qarashaǵa deıin iske qosylady.