Shyǵys Qazaqstanda jer úılerdegi órt 12 paıyzǵa kóbeıgen

ÓSKEMEN. KAZINFORM — Shyǵys Qazaqstan oblysynyń qutqarýshylary jylytý maýsymyn qorytyndylady. 

Byltyrǵy kúz ben bıylǵy kóktem aralyǵynda óńir boıynsha jer úıler aýmaǵynda 351 órt shyqqan. Bul kórsetkish aldyńǵy jylytý maýsymymen salystyrǵanda 12%-ǵa artyp otyr. Tilsiz jaýdyń kóbi monshalar men sharýashylyq qora-jaılarda tirkelgen.

— Al órt saldarynan qaza bolǵandar sany 7%-ǵa azaıdy. Olardyń basym bóligi — jumyssyzdar men zeınetkerler. 47% jaǵdaı tósekke mas kúıde jatyp shylym shegý saldarynan bolǵan. Otty abaısyz qoldanýdyń saldarynan 6 adam, al pesh jabdyqtaryn ornatý jáne paıdalaný kezinde órt qaýipsizdigi talaptaryn saqtamaǵannan 3 adam kóz jumdy, — dep habarlady ShQO TJD baspasóz qyzmetinen.

Shyǵys Qazaqstanda pesh jaǵyp otyrǵan áleýmettik turǵyda osal otbasylar azamattyq qorǵaý organdarynyń erekshe baqylaýynda. TJD jáne jergilikti atqarýshy organdar bul sanattaǵy azamattardyń ár úıine eki retten profılaktıkalyq tekseris júrgizgen. Nátıjesinde úılerdiń 36%-ynda órt qaýipsizdigi talaptarynyń buzylǵany anyqtaldy.

Jalpy jylytý maýsymynda 23 adamǵa ıis tıip, 2 adam qaza bolǵan. Ótken jylmen salystyrǵanda zardap shekkender sany 32%-ǵa azaıdy.

Eske salsaq, osyǵan deıin Óskemen turǵynyn óltirgen er adam qylmysyn jasyrý úshin páterdi órtep jibergeni jaıly jazǵanbyz.