Shyǵys Qazaqstanda jer kezeginde 45 myńǵa jýyq adam tur

ÓSKEMEN. KAZINFORM – Shyǵys Qazaqstan oblysynda 17 myńnan astam adamǵa úı salýǵa jer berildi.

Óńir boıynsha jeke turǵyn úı qurylysyna jer ýchaskesin alýǵa ótinish bergender sany artyp keledi. Búginde barlyǵy kezekte 44760 adam tur. Bul týraly Kazinform tilshisiniń resmı saýalhatyna jaýap joldaǵan ShQO Jer qatynastary basqarmasy basshysynyń mindetin atqarýshy Dáýlet Sarmanov málim etti.

- QR Jer kodeksiniń 44-babyna sáıkes jeke turǵyn úı salý úshin sýmen jáne elektrmen jabdyqtaý jelilerimen qamtamasyz etilgen jer ýchaskeleri ǵana beriledi. Ortalyqtandyrylǵan sýmen jabdyqtalmaǵan eldi mekenderde mundaı jer ýchaskelerin berýge elektrmen jabdyqtaý jelileri bolǵan kezde ǵana ruqsat etilgen. Jeke turǵyn úı qurylysy úshin jer ýchaskeleri suralǵan kezde azamattardyń ótinishteri arnaýly esepke alynady jáne bólip berýge arnalǵan alańdardyń daıyn bolýyna qaraı ne jeke turǵyn úı qurylysy úshin paıdalanylatyn bos aýmaqtar bolǵan kezde qanaǵattandyrylady, - dedi ol.

Qazir Shyǵys Qazaqstanda barlyǵy 17239 adamǵa jer ýchaskesi berildi. Qala, aýdandarǵa bólip aıtar bolsaq:

- Altaı aýdany – 588 ýchaske;

- Glýbokoe aýdany – 471 ýchaske;

- Zaısan aýdany – 789 ýchaske;

- Katonqaraǵaı aýdany – 194 ýchaske;

- Kúrshim aýdany – 155 ýchaske;

- Samar aýdany – 160 ýchaske;

- Tarbaǵataı aýdany – 72 ýchaske;

- Ulan aýdany – 475 ýchaske;

- Shemonaıha aýdany – 325 ýchaske;

- Rıdder qalasy – 640 ýchaske;

- Óskemen qalasy – 13370 ýchaske;

- Arnaýly esepke qoıý kezinde azamattyń jeke turǵyn úı qurylysy úshin memleket quqyq bergen jer ýchaskeleriniń bar nemese joq ekendigi eskeriledi. Ol týraly málimetter memlekettik korporatsııadan suratylady. Qazaqstan Respýblıkasynyń azamattaryna jeke turǵyn úı qurylysy úshin jer ýchaskelerin olardyń ótinishterin arnaýly esepke qoımaı berýge tyıym salynady, - dedi Dáýlet Sarmanov.

Eske salsaq, Pavlodar oblysynda 59 myńnan astam adam jer kezeginde turǵany jaıly jazǵanbyz.