Shyǵys Qazaqstanda jasóspirimder arasyndaǵy qylmys azaıdy
ÓSKEMEN. KAZINFORM – Shyǵys Qazaqstan oblysynda osy jyldyń basynan beri jasóspirimder arasyndaǵy qylmys 14 paıyzǵa azaıyp otyr.
ShQO prokýratýrasy baspasóz qyzmetiniń málimetinshe, kámeletke tolmaǵandar arasyndaǵy qylmystyń aldyn alý máselesi kún tártibinde. Elimizde jasóspirimder arasyndaǵy qylmys óskenimen, Shyǵys Qazaqstanda 2023 jyldyń qorytyndysy boıynsha 23%-ǵa tómendeýi baıqaldy.
«Al osy jyldyń basynan beri barlyǵy 19 qylmys tirkelip otyr. Bul byltyrǵy kezeńmen salystyrǵanda 14%-ǵa az. Oblys prokýratýrasy júrgizgen taldaý qıyn ómirlik jaǵdaıǵa tap bolǵan árbir otbasymen jeke jumys júrgizip, jasóspirimderdiń bos ýaqytyn uıymdastyrý, sport sektsııalary men úıirmelerge kóptep tartý qajettigin kórsetti. Sondaı-aq bilim berý uıymdary, polıtsııa jáne jergilikti atqarýshy organdar arasyndaǵy ózara is-qımyldy kúsheıtý kerek», - delingen aqparatta.
Balalar men jasóspirimder arasyndaǵy sýıtsıd pen býllıngtiń aldyn alý taqyryby da ózektiligin joıǵan joq. Osy rette, mektep psıhologtarynyń róli mańyzdy.
