Shyǵys Qazaqstanda jarylyp ketken júk kóligine qatysty tergeý aıaqtaldy
ÓSKEMEN. KAZINFORM — Shyǵys Qazaqstan oblysynda jolda kele jatyp jarylyp ketken júk kóligine qatysty tergeý máresine jetti.
Ótken jyldyń qarasha aıynda Óskemen-Samar tasjolynda júk kóligindegi jarylystan eki adam kóz jumǵan edi. Qazaqstanda jarylystyń sebebin anyqtaýǵa qabiletti sarapshy tabylmaǵandyqtan, sheteldik mamandardy tartýǵa týra kelgen. Bul týraly Memlekettik eńbek ınspektsııasy komıteti ShQO boıynsha departamenti basshysynyń orynbasary Qaırat Ábilqaıyrov málim etti.
— Saraptama júrgizý úshin Máskeýden arnaıy mamandar keldi. Sol komıssııanyń málimetinshe, qaıǵyly jaǵdaı kólik shanaǵyndaǵy jylytqyshtyń qosylǵanynan bolǵan. Bul jylytý júıesi sýsymaly júkter qysta qatyp qalmas úshin qoldanylǵan, — deıdi ol.
Alaıda bul jarylysqa ákelip soqty. Sebebi shanaq ishindegi temperatýra 300 gradýsqa deıin jetti. Al jarylys qaýpi 290 gradýsta týyndaıdy. Tergeý materıaldary polıtsııaǵa jiberildi.
Eske salsaq, osyǵan deıin Almatyda kólik aýdarylyp, 1 adam mert bolǵany habarlanǵan.