Shyǵys Qazaqstanda jańa oqý jylynda qansha mektep ashylady
ÓSKEMEN. KAZINFORM – Shyǵys Qazaqstan oblysynda 1 qyrkúıekke deıin 5 jańa mektep paıdalanýǵa beriledi. Onyń ishindegi 4 mektep «Keleshek mektep» ulttyq jobasy aıasynda salynǵan. Jańa bilim ordalarynyń 3-i qazaq tilinde, 2-i aralas tilde bilim beredi.
— Úsh mektep Óskemen qalasynda boı kóteredi. Atap aıtqanda, № 40 orta mektep Ývalıev kóshesinde ornalasqan. 600 oryndyq bilim ordasy qazaq tilinde oqytady. Tımofeev kóshesindegi № 31 orta mektep 300 oryndyq. Ol oqýshylardy qazaq jáne orys tilderinde qabyldaıdy. Al 19-shaǵyn aýdandaǵy Esenberlın kóshesinde salynyp jatqan qazaq tilindegi mektep 600 orynǵa shaqtalǵan, — dep jaýap berdi ShQO Bilim basqarmasynan Kazinform tilshisiniń saýalhatyna.
Glýbokoe aýdany Beloýsov № 2 orta mektebi «Keleshek mektep» jobasy aıasynda salynyp jatyr. 300 oryndyq mektep qazaq jáne orys tilderinde oqytady. Zaısan qalasynda paıdalanýǵa beriletin Saýryk orta mektebi qazaq tilinde bilim beredi. Onda 300 bala oqýǵa qabyldanady.
— 2023-2025 jyldar aralyǵynda «Keleshek mektep» ulttyq jobasy aıasynda jalpy 3000 orynǵa arnalǵan 7 mekteptiń qurylysy qarastyrylǵan bolatyn. 2024 jyly jalpy 2100 orynǵa arnalǵan 5 mekteptiń qurylys-montaj jumystary aıaqtaldy. Olar: Óskemen qalasynda — 900 orynǵa arnalǵan 2 mektep, Rıdder qalasynda — 600 oryndyq mektep, Shemonaıha qalasynda — 300 oryndyq mektep, Glýbokoe aýdanynda — 300 oryndyq mektep, — delingen málimette.
Qazirgi tańda 6 beıimdelgen mekteptiń ornyna 450 orynǵa arnalǵan 6 mekteptiń qurylysy bastalǵan. Bul baǵytta memorandýmǵa qol qoıyldy.
Olar:
• Samar aýdany Samarskoe aýyly — 150 oryndyq oqý-ákimshilik ortalyǵy,
• Zaısan aýdany Sarjyra aýyly — 50 oryndyq,
• Marqakól aýdany Tosqaıyń aýyly — 100 oryndyq,
• Tarbaǵataı aýdany Saryóleń aýyly — 50 oryndyq,
• Kúrshim aýdany Qystaý-Kúrshim aýyly — 50 oryndyq,
• Marqakól aýdany Qaınarly aýyly — 50 oryndyq oqý-ákimshilik ortalyǵy.
Sonymen qatar 2026–2028 jyldary oblystyq bıýdjet esebinen jalpy 1200 orynǵa arnalǵan 3 mekteptiń qurylysy josparlanǵan:
• Óskemen qalasy «Sport» shaǵyn aýdanynda — 600 oryndyq,
• 23-shaǵyn aýdanda — 300 oryndyq,
• Glýbokoe aýdany, Praporşıkovo aýylynda — 300 oryndyq.
Eske salsaq, osyǵan deıin elimizdiń ár óńirinde 30 qyrkúıekke deıin «Mektepke jol» qaıyrymdylyq aktsııasy ótetindigi habarlanǵan.