Shyǵys Qazaqstanda jańa áýejaı salynady

ÓSKEMEN. KAZINFORM – Shyǵys Qazaqstan oblysy Zaısan aýdanynda jańa áýejaı qurylysynyń jobalyq smetalyq qujattamasy ázirlenip jatyr.

Jańa áýejaı Zaısan qalasynan 28 shaqyrym jerde ornalasqan Sátbaı aýylynda salynady. Bul týraly ShQO óńirlik kommýnıkatsııalar qyzmetinde ótken brıfıngide Zaısan aýdany ákiminiń orynbasary Nurǵaını Qabıdoldına málim etti. 

– Jańa áýejaıdyń qurylysy óńirde týrızmniń damýyna serpin berip, turǵyndardyń ómir sapasyn arttyrýǵa yqpal etedi. Joba aıasynda áýejaı ǵana emes, zamanaýı ınfraqurylym, jańa joldar, logıstıkalyq qoımalar men basqa da mańyzdy nysandardyń salynýy josparlanǵan, - dedi ol. 

Sonymen qatar aýdanda respýblıkalyq mańyzdaǵy birneshe iri joba júzege asyrylýda. Onyń ishinde eń mańyzdysy – «Omsk-Maıqapshaǵaı» tasjolyn qaıta jańǵyrtý jobasy. 

Bul joba «Qazavtojol» AQ tarapynan qolǵa alynyp, 17,4 mlrd teńge bólingen. Bul bastamalar óńirdiń ekonomıkalyq áleýetin arttyryp, Qazaqstannyń shyǵysyndaǵy kólik-logıstıkalyq júıeniń damýyna úles qosady dep kútilip otyr. 

Eske salsaq, osyǵan deıin Rıdderdegi elektr jelisi qurylysynyń sozbalańǵa salynyp kele jatqanyna 7 jyldan asqany habarlanǵan.