Shyǵys Qazaqstanda zańsyz altyn qazǵandar qolǵa tústi
ASTANA. KAZINFORM — Shyǵys Qazaqstanda zańsyz altyn óndirýge qatysty qylmystyq is qozǵaldy, dep habarlaıdy oblystyq prokýratýranyń baspasóz qyzmeti.
Bıyl sáýir aıynda Kúrshim aýdanynyń prokýratýrasy ShQO boıynsha UQKD jáne Kúrshim orman sharýashylyǵynyń qyzmetkerlerimen birlesip, Maraldy aýyldyq okrýginiń «Kólshilik» ýchaskesinde reıdtik is-sharalar júrgizý barysynda zańsyz altyn óndirý faktisin anyqtady.
Paıdaly qazbalardy óndirý aýyr mamandandyrylǵan tehnıka men spýtnıktik baılanys quraldaryn qoldaný arqyly júzege asyrylǵany belgili boldy.
— Qylmys ústinde 4 adam ustaldy, onyń ishinde memleketimizdiń shyǵysynda zańsyz júrgen Ózbekstan Respýblıkasynyń azamaty da bar. Shynjyr tabandy ekskavator, avtokólik, mototsıkl, qymbat turatyn metall izdegishter, qol quraldary jáne ózge de jabdyqtar tárkilendi. Atalǵan fakti boıynsha Qazaqstan Respýblıkasy Qylmystyq kodeksiniń 295-1-babymen qylmystyq is qozǵaldy, — delingen habarlamada.
Qazirgi ýaqytta istiń barlyq mán-jaılaryn anyqtaýǵa baǵyttalǵan jedel-tergeý is-sharalary júrgizilip jatyr.
Budan buryn Túrkistan oblysynda zańsyz altyn óndirgen top ustalǵanyn jazǵanbyz.
