Shyǵys Qazaqstanda zańǵa qaıshy 3 myńnan astam saıt buǵattaldy

ÓSKEMEN. KAZINFORM – Shyǵys Qazaqstan oblysynyń polıtseıleri esirtki zattaryn usynatyn jáne pornografııalyq sıpattaǵy saıttardy buǵattap jatyr.

ShQO Polıtsııa departamenti baspasóz qyzmetiniń habarlaýynsha, bıyl bul baǵyttaǵy jumystar birshama kúsheıtildi.

Kámeletke tolmaǵandardyń quqyqtaryn qorǵaý jáne zańǵa qaıshy kontentpen kúresý maqsatynda polıtseıler ınternet keńistikti belsendi túrde qadaǵalap keledi. Ótken jyly tyıym salynǵan aqparatty taratqan 1770 saıt anyqtalyp, buǵattaldy. Buǵattalǵandardyń ishinde esirtki zattaryn usynatyn, sýıtsıdti nasıhattaıtyn, pornografııalyq sıpattaǵy materıaldar men zańsyz onlaın-kazıno ornalastyrylǵan saıttar bar.

Al jyl basynan beri buǵattalǵan saıttardyń sany 3 000-nan asqan.

Osy rette, tártip saqshylary azamattardy qyraǵy bolýǵa, kúmándi ınternet-saıttar týraly dereý polıtsııaǵa habarlaýǵa shaqyrdy.

Eske salsaq, osyǵan deıin shymkenttik turǵyn vırtýaldy nómirlerdi paıdalanyp alaıaqtyqpen aınalysqany jaıly jazǵanbyz.