Shyǵys Qazaqstanda úsh jańa órt sóndirý beketi ashyldy
ÓSKEMEN. KAZINFORM — Shyǵys Qazaqstan oblysynyń aýyldarynda úsh jańa órt sóndirý beketi ashyldy.
ShQO TJD baspasóz qyzmetiniń málimetinshe, «Aýyl qutqarýshylary» vedomstvolyq baǵdarlamasy aıasynda Glýbokoe aýdany Tarhanka aýylynda órt sóndirý beketi quryldy. Atalǵan beket Tarhanka, Vınnoe jáne Veseloe eldi mekenderinde turatyn 3000-nan astam turǵynnyń qaýipsizdigin qamtamasyz etpek.
— Jobany Qazaqstan Respýblıkasy Tótenshe jaǵdaılar mınıstrligi qolǵa aldy, al seriktes retinde «Mıleıko» JShS qoldaý kórsetti. Sondaı-aq Shemonaıha aýdanyndaǵy Krasnaıa Shemonaıha jáne Sýgatovka aýyldarynda eki órt sóndirý beketi ashyldy. Ol beketter Krasnaıa Shemonaıha, Belyı Kamen, Sýgatovka, Gorkýnovo jáne Kenıýhovo aýyldarynda turatyn 1500-den astam adam úshin qyzmet kórsetedi, — delingen aqparatta.
Ashylǵan barlyq beketter táýlik boıy qyzmet atqarýǵa arnalǵan qajetti úı-jaılarmen jabdyqtalǵan. Materıaldyq-tehnıkalyq jaraqtandyrý quramyna órt sóndirý jáne qutqarý qural-jabdyqtary, baılanys quraldary jáne jeke quramǵa arnalǵan arnaıy kıimder kiredi.
Eske salsaq, osyǵan deıin Astanada úsh qabatty ǵımarattan órt shyqqany habarlanǵan.