Shyǵys Qazaqstanda shomylý maýsymy bastalǵaly úsh adam sýǵa batty
ÓSKEMEN. KAZINFORM — Shyǵys Qazaqstan oblysynda shomylý maýsymy bastalǵaly beri úsh adam sýǵa batyp ketti. Qaıǵyly oqıǵalardyń barlyǵy sýdaǵy qaýipsizdik erejelerin saqtamaý saldarynan bolǵan.
Alǵashqy qaıǵyly jaǵdaıdan keıin oblystyq Tótenshe jaǵdaılar departamentiniń qyzmetkerleri sý aıdyndaryndaǵy profılaktıkalyq jumystardy kúsheıtti. Jaz basynan beri 1090 reıd ótkizilip, qaýipsizdik talaptaryn buzǵan 80-nen astam adam anyqtalǵan.
Qazirgi ýaqytta balalarymen demalýǵa kelgen otbasylarǵa erekshe kóńil bólinip otyr.
«Balalardy sýdaǵy qaýipten saqtańyz!» respýblıkalyq aktsııasy aıasynda qutqarýshylar jaǵajaılarda ata-analarmen túsindirý jumystaryn júrgizip, kámeletke tolmaǵandardyń qaýipsizdigine eń aldymen eresekter jaýapty ekenin eske salyp jatyr.
— Basty maqsatymyz — qaıǵyly oqıǵalardyń aldyn alý. Sol sebepti oblystyń halyq kóp shoǵyrlanatyn sý aıdyndarynda profılaktıkalyq jumystar kún saıyn júrgiziledi, — deıdi qutqarýshylar.
TJD qyzmetkerleri azamattardy tek arnaıy jabdyqtalǵan jaǵajaılarda shomylýǵa, mas kúıde sýǵa túspeýge, beıtanys jerlerde júzbeýge jáne balalardy qaraýsyz qaldyrmaýǵa shaqyrady. Sondaı-aq qaıyqpen, katermen nemese ózge de júzý quraldarymen júrgen kezde mindetti túrde qutqarý keýdeshesin kııý qajet.
Eske salsaq, osyǵan deıin Qapshaǵaıda jas qyz ben jigit sýǵa batyp ketkeni habarlanǵan.
