Shyǵys Qazaqstanda pnevmonııaǵa shaldyqqandar sany 2 jarym esege artyp ketti
ÓSKEMEN. KAZINFORM – Shyǵys Qazaqstan oblysynda bıyl pnevmonııaǵa shaldyqqandar sany 2 jarym esege artyp ketti.
ShQO Densaýlyq saqtaý basqarmasy baspasóz qyzmetiniń málimetine súıensek, óńirde bıyl 2526 adamǵa pnevmonııa dıagnozy qoıylǵan.
Onyń ishinde 14 jasqa deıingi balalar – 787, 15-17 jas aralyǵyndaǵy jasóspirimder – 86, eresekter – 1653.
«Ótken jylǵy sáıkes kezeńde pnevmonııaǵa shaldyqqandar sany 1023 adamdy quraǵan. Demek, bıyl naýqastar sany 2 jarym esege artyp otyr. Aýyrǵandar sanynyń kóbeıýi erte dıagnostıka kórsetkishteriniń jaqsarýyna baılanysty», - delingen aqparatta.
Vedomstvo ókilderiniń habarlaýynsha, bıyl oblys boıynsha koronavırýs ınfektsııasyn juqtyrǵandar tirkelmegen.
Osyǵan deıin Túrkistan oblysynda JRVI juqtyrǵandar sany 43,6 paıyzǵa jetkenin jazdyq.
