Shyǵys Qazaqstanda órt qaýipsizdigi talaptaryn saqtamaǵan 90-ǵa jýyq adam jaýapqa tartyldy

ÓSKEMEN. KAZINFORM — Shyǵys Qazaqstan oblysynda órt qaýipsizdigi talaptaryn saqtamaǵan 88 adam aıyppul arqalady.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha jyl basynan beri 27 orman jáne 40-qa jýyq dala órti tirkelgen. 

— Oblysta órt qaýipsizdigin qamtamasyz etý maqsatynda azamattyq qorǵaý kúshteri, jergilikti polıtsııa qyzmeti, orman sharýashylyǵy jáne jergilikti atqarýshy organdardyń 290 adamynan turatyn 52 mobıldi top jumys isteıdi. Olar bıyl 1828 reıd ótkizip, 88 adamdy ákimshilik jaýapkershilikke tartty, — delingen aqparatta.

Qutqarýshylar halyqqa 400 dóńgelek ústel, 532 jınalys, 4700 nusqaýlyq uıymdastyrǵan. Sonyń nátıjesinde 14 000-nan astam adam qamtylǵan.

— Shyǵys Qazaqstan aýmaǵynda bıyl 12 taktıkalyq-arnaıy oqý-jattyǵý ótkizildi. Oǵan 836 adam, 307 tehnıka jáne 1 órt sóndirý poıyzy tartyldy. Tabıǵı órtterdiń taralýyna jol bermeý maqsatynda 2068 shaqyrym mıneraldanǵan jolaq jasaldy. Tótenshe jaǵdaılarǵa ýaqtyly áreket etý maqsatynda ákimdikter tarapynan 57 órt beketi jumys istep tur, — delingen habarlamada.

Eske salsaq, osyǵan deıin «Almaty-Óskemen» tasjolynda júk kóligi órtengeni habarlanǵan.