Shyǵys Qazaqstanda órt qaýpi joǵary kezeń bastaldy
ÓSKEMEN. KAZINFORM – Shyǵys Qazaqstan oblysynda 13 sáýirde órt qaýpi joǵary kezeń bastaldy. Eldegi ormannyń shamamen 40%-y shoǵyrlanǵan bul óńir joǵary qaýip aımaǵyna jatady.
ShQO tótenshe jaǵdaılar departamenti baspasóz qyzmetiniń málimetine súıensek, orman jáne dala órtimen kúreske daıyndyq jumystary qarqyndy júrgizilip jatyr.
- Abaı oblysyndaǵy aýqymdy órtterden keıin aldyn alý jáne qyzmetterdiń daıyndyǵy máselesi ózekti bola tústi. Ótken jyly Shyǵys Qazaqstanda 27 orman órti tirkelip, 200 gektardan astam aýmaqty sharpydy. Keltirilgen shyǵyn 2 mln teńgeden asty. Qazirgi tańda ormandy qorǵaýmen 13 orman sharýashylyǵy, eki memlekettik tabıǵı qoryq jáne bir ulttyq park aınalysady. Tikeleı kúzetti 48 orman órt sóndirý stantsııasynyń bólimsheleri men «Qazavıalesoohrana» mamandary júzege asyrady, - delingen aqparatta.
TJD quramynda 1329 qyzmetker men 249 tehnıka, onyń ishinde 128 órt sóndirý kóligi (90-y joǵary ótimdi) bar. Budan bólek, orman qorǵaý kúshteri 1100-den astam adamnan turady, al erekshe qorǵalatyn tabıǵı aýmaqtarda taǵy 400-den astam maman jumys isteıdi.
Órt oshaqtaryn erte anyqtaý úshin «Qazaqstan Ǵarysh Sapary» kompanııasymen birlesken ǵaryshtyq termonúkteler monıtorıngi qoldanylady. Sonymen qatar, Rıdder qalasy men Altaı, Ulan aýdandarynda toǵyz dron paıdalanylady.
- Aldyn alý sharalary da kúsheıtildi. Óńirde patrýldeý shemalary bekitilip, polıtsııa, qutqarýshylar jáne ormanshylar múshe bolatyn mobıldi toptar qurylyp jatyr. Bıyl 62 shaqyrym mıneraldanǵan jolaq salý, 540 shaqyrymyn kútip ustaý jáne 239 eskertý belgilerin ornatý josparlanǵan, - delingen habarlamada.
Eske salsaq, osyǵan deıin Astanada kópqabatty turǵyn úıden órt shyǵyp, úsh bala qaza tapqany habarlanǵan.
