Shyǵys Qazaqstanda ormanǵa jaıylǵan iri órt sóndirildi
ÓSKEMEN. KAZINFORM - Shyǵys Qazaqstan oblysynyń Kúrshim aýdanyndaǵy Abaı aýyldyq okrýgi aýmaǵynda shyqqan tabıǵı órt tolyqtaı sóndirildi. Jalyn ishinara Kúrshim orman sharýashylyǵy aýmaǵyna taralǵan bolatyn.
Jetý qıyn ormandy aımaqtaǵy órtti sóndirýge Tótenshe jaǵdaılar mınıstrliginiń bólimsheleri, Ekologııa jáne tabıǵı resýrstar mınıstrliginiń kúshteri, orman sharýashylyǵy qyzmetkerleri men jergilikti atqarýshy organdar jumyldyrylǵan.
- «Qazavıaormanqorǵaý» desantyn órt oshaǵyna jetkizý úshin TJM tikushaqtary jáne Shyǵys Qazaqstan oblysy ákimdiginiń avıatsııasy tartyldy. Jerústi tehnıkasy bara almaıtyn aýmaqtarda áýeden sóndirý jumystaryn TJM-niń «Qazavıaqutqarý» aktsıonerlik qoǵamynyń sý tógetin qurylǵymen jabdyqtalǵan tikushaǵy júrgizdi. Barlyǵy 41 márte sý tógildi. Jalpy tógilgen sý kólemi 123 tonnany qurady, - dep habarlady ShQO TJD baspasóz qyzmetinen.
Sonymen qatar mamandar jeldiń baǵyty men órttiń taralýyn úzdiksiz baqylap otyrdy.
- Barlyq jumyldyrylǵan qyzmetterdiń úılesimdi jumysynyń arqasynda órttiń odan ári taralýyna jol berilmedi. Eldi mekenderge qaýip joq, - delingen habarlamada.
Qazirgi ýaqytta tilsiz jaý tolyqtaı sóndirildi. Órttiń jalpy aýmaǵy orman qory boıynsha 45 gektardy, al ashyq aýmaqta 1155 gektardy qurady.
Eske salsaq, osyǵan deıin ShQO-daǵy órtti sóndirýge tikushaq tartylǵany habarlanǵan.
