Shyǵys Qazaqstanda monopolısterden 4 mln teńgeden astam qarajat tárkilendi
ÓSKEMEN. KAZINFORM — Shyǵys Qazaqstan oblysynda monopolısterdiń áreketine baqylaý kúsheıtildi.
Ótken jyldyń basynan 2025 jyldyń birinshi toqsanyna deıingi aralyqta oblys kólemindegi 16 kásiporyn ákimshilik jaýapkershilikke tartylǵan. Olarǵa salynǵan aıyppuldyń jalpy kólemi — 7,7 mln teńge.
Qosymsha 4,1 mln teńge kólemindegi monopolııalyq kiris tárkilendi. Bul týraly QR Básekelestikti qorǵaý jáne damytý agenttigi ShQO boıynsha departamenti basshysynyń orynbasary Renat Nábıev málim etti.
— Osy ýaqyt aralyǵynda departament mamandary monopolııaǵa qarsy 8 tergeý júrgizip, tórt ákimshilik is qozǵady. Budan bólek, jumsaq retteý saıasaty aıasynda 13 habarlama men eki eskertý berildi. Sonyń biri — kómir baǵasynyń ósýine qatysty boldy, — dedi ol.
Qoǵamǵa tikeleı áser etetin salalarǵa erekshe nazar aýdarylyp otyr. Basym baǵyttar qatarynda — suıytylǵan gaz, azyq-túlik, ınternet, janarmaı jáne bilim berý qyzmetteri naryǵy bar. Jetkizýshilermen júıeli jumys júrgizý úshin 39 monopolııaǵa qarsy komplaens kelisim jasalǵan.
— Bıznestiń damýyna kedergi keltiretin tosqaýyldardy joıý jumystary departament janyndaǵy arnaıy keńes arqyly júzege asyrylyp jatyr. Keńes quramyna negizinen jekemenshik kompanııa ókilderi kiredi. Byltyrǵy jyldan beri 24 otyrys ótti, — deıdi Renat Nábıev.
Sonymen qatar birqatar memlekettik jáne kommýnaldyq kásiporyndardyń monopolııaǵa qarsy organmen kelispeı áreket etkeni anyqtalǵan. Áleýmettik-kásipkerlik korporatsııalarǵa, ákimdikter men kommýnaldyq qyzmetterge nusqamalar joldandy. Barlyq eskertý belgilengen merzimde oryndaldy.
Eske salsaq, osyǵan deıin BQO-da monopolııaǵa qarsy zańnamany buzǵany úshin «Aqjaiyq» ÁKK-ǵa aıyppul salynǵany habarlanǵan.