Shyǵys Qazaqstanda mamyr aıynda aýa raıy qubylmaly bolmaq
ÓSKEMEN. KAZINFORM – Shyǵys Qazaqstan oblysynda kóktemniń sońǵy aıynda kún birese sýytyp, birese ysyp, aýa raıy qubylyp turady.
«Qazgıdromet» RMK oblystyq fılıalynyń málimetinshe, aıdyń basy birshama jyly bastalady. Mamyrdyń alǵashqy kúnderi kúndiz aýa temperatýrasy +14…+19°S-qa deıin jylynady, alaıda túnde áli de úsik júrýi múmkin. Al alǵashqy onkúndiktiń sońyna qaraı temperatýra aıtarlyqtaı kóterilip, keı jerlerde +26…+31°S-qa jetedi.
- Aı boıy jylynýdan keıin qysqa merzimdi salqyndaý baıqalyp, artynsha qaıtadan ystyq aýa raıy oralady. Mundaı qubylmaly jaǵdaılar óńirdegi kóktem mezgiline tán, - delingen aqparatta.
Ekinshi onkúndikte aýa raıy qaıta ózgeredi. Qysqa ýaqyttyq salqyndaý kezinde kúndizgi temperatýra +16…+21°S, túnde +5…+10°S shamasynda bolady. Odan keıin jylý qaıta oralyp, keı aýdandarda +30…+35°S-qa deıin ystyq kútiledi. Alaıda onkúndik sońyna qaraı aptap báseńdeıdi.
Al úshinshi onkúndikte aýa raıy ysyǵanymen, keıin temperatýra kúrt tómendeıdi. Kúndiz +10…+15°S-qa deıin salqyndap, túnde 0…+5°S-qa deıin túsedi. Taýly jerlerde -5°S-qa deıin úsik bolýy múmkin.
Aı sońyna qaraı temperatýra qaıtadan kóterile bastaıdy. Jalpy alǵanda, mamyr aıy óńirde qubylmaly aýa raıymen erekshelenedi.
Eske salsaq, osyǵan deıin SQO-da sáýir aıynda aýa raıy qandaı bolatyndyǵy jaıly jazǵanbyz.
