Shyǵys Qazaqstanda kúzgi naýqanda 700 adam áskerge jiberilmek
ÓSKEMEN. KAZINFORM — Shyǵys Qazaqstan oblysynda qyrkúıek aıynan bastap azamattardy merzimdi áskerı qyzmetke kúzgi shaqyrý naýqany júrip jatyr.
Bıyl óńirden Qazaqstan Respýblıkasynyń Qarýly Kúshteri men ózge de áskerı quralymdarǵa shamamen 700 azamatty jiberý josparlanǵan. Bul týraly Óńirlik kommýnıkatsııalar qyzmetinde ótken brıfıngte ShQO Qorǵanys isteri jónindegi departamenti bastyǵynyń orynbasary Qazbek Ahmetov málimdedi.
— Otan aldyndaǵy boryshyn óteýge shaqyrylatyn azamattarǵa turǵylyqty jeri nemese jumys orny boıynsha áskerge shaqyrý qaǵazy tabystalady. Budan bólek, 1414 qyzmeti arqyly SMS-habarlama jiberiledi. Áskerı esep júrgizý júıesi de tsıfrlyq formatqa kóshirilip jatyr. Sonyń arqasynda qajetti aqparatty alyp, birqatar memlekettik qyzmetti qashyqtan rásimdeýge bolady. Máselen, áskerı qyzmetti keıinge qaldyrý nemese odan bosatý týraly ótinish eGov.kz portaly arqyly qabyldanady. Barlyq memlekettik qyzmet tegin kórsetiledi, — dedi ol.
Osy rette, Qorǵanys isteri jónindegi departament shaqyrý máselesin aqyly túrde sheshýge ýáde beretin deldaldarǵa senbeýge shaqyrady. Áskerı qyzmetten jaltarǵan azamattar zańǵa sáıkes jaýapqa tartylýy múmkin. Tıisti rásimderden ótken azamattar QR Qarýly Kúshteri men basqa da áskerı quralymdardyń bólimderine jiberiledi.
Eske salsaq, osyǵan deıin Pavlodardan 700-den astam jas ásker qataryna shaqyrylatyndyǵy habarlanǵan.
