Shyǵys Qazaqstanda kúzdiń alǵashqy aıynda aýa raıy qubylmaly bolmaq
ÓSKEMEN. KAZINFORM — Shyǵys Qazaqstan oblysynda qyrkúıek aıynyń basynda aýa raıy ystyq bolǵanymen, keıin óńirdiń jekelegen aýdandarynda úsik júrýi múmkin.
Kúzdiń alǵashqy aıynyń ishinde jyly aýa raıy birneshe ret qaıta oralady. Al aı sońyna qaraı oblystyń soltústik-shyǵysynda aýa temperatýrasy -4 gradýsqa deıin tómendeýi yqtımal. Sınoptıkter taýly aımaqtarda alǵashqy jańbyr aralas qar jaýýy múmkin dep boljap otyr.
Jalpy qyrkúıek aıynda Shyǵys Qazaqstanda aýa raıy klımattyq normaǵa saı bolady dep boljanǵan. Aıdaǵy ortasha temperatýra +7-den +14,8 gradýsqa deıin bolady. Degenmen aýa raıy jıi qubylyp turmaq.
— Qyrkúıektiń alǵashqy kúnderi jazdyń jalǵasyn sezinýge múmkindik beredi. Kúndiz aýa temperatýrasy +24, keı jerlerde +29 gradýsqa deıin kóteriledi. Alaıda keıin temperatýra kúrt tómendeıdi. Kúndiz +11…+16 gradýs, túnde nebári +1…+6 gradýs bolady. Oblystyń batysy men soltústik-shyǵysynda osy kezeńniń ózinde alǵashqy úsik júrýi múmkin. Temperatýra -1 gradýsqa deıin tómendeıdi, — dep habarlady «Qazgıdromed» RMK oblystyq fılıalynan.
Alǵashqy sýyqtan keıin kún qaıta jylynady. Biraq 10 qyrkúıekke qaraı aýa temperatýrasy taǵy da tómendeıdi.
Aıdyń ortasynda aýa raıy apta saıyn derlik qubylyp turady. Ekinshi onkúndiktiń basyndaǵy salqynnan keıin kúndiz qaıtadan +20, keı jerlerde +25 gradýsqa deıin jylynady. Túnde temperatýra +15 gradýsqa deıin jetýi múmkin. Odan keıin taǵy bir kúrt sýytý kezeńi bolady.
— Ekinshi onkúndiktiń sońyna qaraı túnde aýa temperatýrasy +1…+6 gradýs aralyǵynda bolady. Oblystyń shyǵysynda -1 gradýsqa deıin úsik júrýi múmkin. Kúndiz aýa temperatýrasy +10…+15 gradýs shamasynda bolady, — delingen habarlamada.
20 qyrkúıekten keıin kúndiz aýa temperatýrasy taǵy da +17…+22 gradýsqa, al túnde +7…+12 gradýsqa deıin kóterilýi yqtımal.
Alaıda qyrkúıek aıynyń sońynda kún sýytady. Kúndiz nebári +4…+9 gradýs, túnde +1…+6 gradýs bolady. Oblystyń soltústik-shyǵysynda sınoptıkter -4 gradýsqa deıin úsik bolatynyn boljap otyr.
Sonymen qatar qyrkúıek aıy oblysta jaýyn-shashyndy bolýy múmkin. Óńir aýmaǵynyń basym bóliginde jaýyn-shashyn mólsheri klımattyq normadan joǵary bolady dep boljanǵan.
Aıta keteıik, búgin batystaǵy eki qalada aýa sapasy nasharlaıdy.
