Shyǵys Qazaqstanda kúzde 800-ge jýyq azamat ásker qataryna shaqyrylady

ÓSKEMEN. KAZINFORM – Shyǵys Qazaqstan oblysynda 1 qyrkúıekte kúzgi áskerge shaqyrý naýqany bastalady. 

Naýqan 31 jeltoqsanǵa deıin sozylady. Osy aralyqta óńir boıynsha shamamen 800 jas áskerge shaqyrylmaq. Bul týraly ShQO Qorǵanys isteri jónindegi departamenti bastyǵynyń orynbasary Jánibek Saparov Óńirlik kommýnıkatsııalar qyzmetinde ótken brıfıng barysynda málimdedi.

– «Áskerı qyzmet jáne áskerı qyzmetshiniń mártebesi týraly» zańǵa sáıkes, merzimdi áskerı qyzmetke keıinge qaldyrý nemese bosatylý sebepteri joq 18 ben 27 jas aralyǵyndaǵy er azamattar shaqyrylady. Qyzmet etý merzimi - 12 aı. Bıyl naýqandy uıymdastyrý maqsatynda Shyǵys Qazaqstanda 10 shaqyrý jáne medıtsınalyq komıssııa jumys isteıdi. Oblystan áskerge alynǵan jigitter eldiń barlyq aımaqtaryna jiberiledi, - dedi ol. 

Áskerı shaqyrý kezeń-kezeńimen tsıfrlyq formatqa kóshirilip jatyr.

– Áskerge shaqyrylýshylarǵa habarlamalar SMS arqyly jáne eGov portalynyń jeke kabıneti arqyly joldanady. Medıtsınalyq komıssııaǵa kelmegeni nemese ádeıi jaltarǵany úshin ákimshilik jáne qylmystyq jaýapkershilik bar. Naqty aıtqanda, aıyppuldan bastap, bir jylǵa deıin bas bostandyǵynan aıyrýǵa deıingi jaza qarastyrylǵan, - dedi Jánibek Saparov.

Qorǵanys mınıstrligi áskerı qyzmettiń tartymdylyǵyn arttyrý baǵytynda jumys júrgizip jatyr. Eldiń 80-nen astam joǵary oqý ornymen jasalǵan kelisim aıasynda áskerı qyzmetin abyroımen ótkerip, jaqsy nátıje kórsetken azamattar ýnıversıtetke emtıhansyz, oqý ornynyń esebinen qabyldanady. Jigitterdi bólý kezinde olardyń bilimi, kásibı daıyndyǵy, densaýlyǵy, otbasylyq jaǵdaıy jáne jeke qalaý eskeriledi.

Eske salsaq, osyǵan deıin elordada merzimdi áskerı qyzmetin aıaqtaǵan sarbazdarǵa bilim granty tabystalǵany habarlanǵan.