ShQO-da kúrish pen jumyrtqa baǵasynyń ózgerýine ne sebep

Shyǵys Qazaqstan oblysynda kúrish pen jumyrtqanyń baǵasy ósti, dep habarlaıdy Kazinform.

ShQO Aımaqtyq kommýnıkatsııalar qyzmetinde ótken baspasóz máslıhatynda oblystyq Kásipkerlik jáne ındýstrııalyq-ınnovatsııalyq damý basqarmasynyń saýda salasyndaǵy memlekettik saıasatty iske asyrý bóliminiń bas mamany Jadyra Erlanova óńirde jumyrtqa men kúrish baǵasynyń ne sebepti qymbattaǵanyn túsindirip berdi.

«Memleket tarapynan qus fabrıkalaryna dotatsııanyń bolmaýy, kommýnaldyq qyzmet, janarmaı, jemshóp jáne dárýmendi qospalar baǵalardyń ósýi taýyq jumyrtqasy baǵasynyń kóterilýine sebep bolsa, kúrishtyń qymbattaýy Qyzylorda oblysy óndirýshileriniń kóterme baǵany ósirýine baılanysty boldy», - dedi ol.

Oblysta áleýmettik mańyzy bar azyq-túlik baǵasyn turaqtandyrý maqsatynda «aınalym shemasyn» iske asyrý jalǵasýda. Bıýdjetten 4,2 mlrd teńge kóleminde qarajat bólingen. Apta saıyn aýyl sharýashylyǵy jármeńkeleri uıymdastyrylýda. Jyl basynan beri 447 jármeńke ótkizilip, 1,7 mlrd teńgeniń ónimi satyldy.

Jadyra Erlanovanyń aıtýynsha, jemis-kókónis ónimderin arzan baǵada satý úshin 24 saýda pavılony jáne ónimdi ótkizý týraly memorandým jasasqan 34 saýda núktesi jumys istep tur.