Shyǵys Qazaqstanda qurylysy zańsyz júrgizilgen 12 nysan súrildi

Bul týraly Óńirlik kommýnıkatsııalar qyzmetinde ótken brıfıngte ShQO Memlekettik sáýlet-qurylys baqylaýy basqarmasy basshysynyń mindetin atqarýshy Samat Qaıyrdınov málim etti.

— Bıyl toǵyz aıda júrgizilgen jospardan tys tekserýlerdiń nátıjesinde 284 ákimshilik is qozǵaldy. Kompanııalardan jobalyq qujattamasyz qurylys júrgizý jáne qurylys jumystarynyń sapasyna qoıylatyn talaptardy buzý sııaqty zańbuzýshylyqtar anyqtalǵan. Nátıjesinde 133 qurylys lıtsenzııasynyń qoldanysy alty aıǵa toqtatyldy. Taǵy 9 lıtsenzııanyń kúshi joıyldy, — dedi ol.

Zańbuzýshylyqtardy joıý týraly 133 nusqama berilip, 12 nysan súrildi.

— Qazir Óskemende 34 turǵyn úı kesheni salynyp jatyr. Mamandar áleýmettik jelilerge turaqty monıtorıng júrgizip, turǵyn úı qurylysyna úlestik qatysý salasyndaǵy talaptardyń saqtalýyn baqylaıdy. Zańbuzýshylyqtar anyqtalǵan jaǵdaıda turǵyndarǵa aqparat beriledi. Qurylys salasyndaǵy memlekettik baqylaý tártibi de ózgerdi. 1 shildeden bastap jańa Qurylys kodeksi kúshine endi. Qujat qurylys sapasy men qaýipsizdigine qoıylatyn talaptardy kúsheıtip, memlekettik baqylaýdyń jańa tetikterin engizdi, — dedi Samat Qaıyrdınov.

Sonyń biri — nysandy paıdalanýǵa qabyldaý rásimine memlekettik qurylys ınspektorynyń mindetti túrde qatysýy. Endi ınspektor nysannyń ornalasqan jerine baryp, onyń belgilengen talaptarǵa sáıkestigin tekseredi. Bul qurylys sapasyn baqylaýdy kúsheıtip, talapqa saı kelmeıtin nysandardyń paıdalanýǵa berilýiniń aldyn alýǵa baǵyttalǵan.

Eske salsaq, osyǵan deıin SQO-da qurylys sapasy qalaı baqylanatyny habarlanǵan.