Shyǵys Qazaqstanda quny 2 mlrd dollar bolatyn «jasyl» energetıkalyq keshen salynady
ASTANA. KAZINFORM – Shyǵys Qazaqstan oblysynda «jasyl» sýtegi men ammıak óndirýge baǵyttalǵan energetıkalyq keshen salý máselesi pysyqtalyp jatyr. Jobanyń aldyn ala quny shamamen 2 mlrd AQSh dollaryn quraıdy.
Joba aıasyndaǵy ózara túsinistik týraly memorandým Qazaqstan Prezıdentiniń Koreıa Respýblıkasyna memlekettik sapary barysynda Energetıka mınıstrligi, Shyǵys Qazaqstan oblysynyń ákimdigi jáne YPP Corporation arasynda jasaldy.
Qujat sýtegi energetıkasy men jańartylatyn energııa kózderi salasyndaǵy yntymaqtastyqty damytýǵa baǵyttalǵan. Taraptar taldamalyq jáne zertteý jumystaryn júrgizý, tájirıbe jáne saraptamalyq bilim almasý, sondaı-aq perspektıvaly baǵyttardy birlesip pysyqtaýdy kózdep otyr.
Memorandým aıasynda jalpy qýaty shamamen 1 GVt bolatyn jańartylatyn energııa kózderi nysandaryn qamtıtyn energetıkalyq keshen qurý múmkindigi qarastyrylyp jatyr. Onda jylyna 55 myń tonnaǵa deıin «jasyl» sýtegi nemese 310 myń tonnaǵa deıin «jasyl» ammıak óndirý kózdelgen.
Jobany júzege asyrýdyń oryndylyǵy rastalǵan jaǵdaıda, onyń aldyn ala quny shamamen 2 mlrd AQSh dollaryn quraıdy.
– Qujatqa qol qoıý taraptardyń jańartylatyn jáne sýtegi energetıkasy salasyndaǵy Qazaqstan-Koreıa yntymaqtastyǵyn odan ári jalǵastyrýǵa jáne osy baǵyttaǵy perspektıvaly jobalar men bastamalardy birlesip pysyqtaý úshin jaǵdaı jasaýǵa nıetti ekenin kórsetedi, – delingen aqparatta.
«Jasyl» sýtegi metallýrgııada, hımııa ónerkásibinde, energetıka men kólik salasynda tómen kómirtekti otyn jáne shıkizat retinde qoldanylady. Al «jasyl» ammıak negizinen tyńaıtqysh óndirisi men hımııa ónerkásibinde paıdalanylady. Sondaı-aq ol halyqaralyq naryqqa jetkizýge qolaıly tómen kómirtekti energııa tasymaldaýshy retinde qarastyrylady.
Qazaqstan jańartylatyn energetıkany damytýǵa basymdyq berip otyr. Memleket basshysy bıylǵy Joldaýynda aldaǵy bes jylda sheteldik ınvestorlardyń qatysýymen jalpy qýaty 6,3 GVt bolatyn «jasyl» energetıka nysandaryn iske qosý josparlanǵanyn aıtqan.
Aıta keteıik, elimizde jasyl energetıkany damytý tujyrymdamasy ázirlenip jatyr.
