Shyǵys Qazaqstanda kókjótelmen aýyrǵandar sany 2 ese artty
ÓSKEMEN. KAZINFORM – Shyǵys Qazaqstan oblysynda jyl basynan beri kókjóteldiń 32 jaǵdaıy tirkeldi. Bul kórsetkish ótken jyldyń sáıkes kezeńimen salystyrǵanda eki ese artyp otyr.
ShQO Sanıtarııalyq-epıdemıologııalyq baqylaý departamentiniń málimetine súıensek, kókjótelge shaldyqqandardyń barlyǵy 14 jasqa deıingi balalar.
– 29 shildedegi jaǵdaı boıynsha oblysta kókjóteldiń 32 jaǵdaıy zerthanalyq túrde rastaldy. Onyń 28-i Óskemende, 4-i Ulan aýdanynda tirkelgen. Aýrýǵa shaldyqqandardyń basym bóligi – bir jasqa deıingi 14 sábı, 1-5 jas aralyǵyndaǵy 17 búldirshin jáne 5-9 jas aralyǵyndaǵy bir bala, – deıdi departament basshysynyń orynbasary Sáýle Slıamǵazına.
Mamandardy alańdatyp otyrǵan negizgi másele – naýqas balalardyń basym bóliginiń ekpe almaýy. Tirkelgen 32 jaǵdaıdyń 30-y vaktsına saldyrmaǵan balalar arasynda anyqtalǵan. Onyń ishinde 17 bala ata-anasynyń bas tartýyna baılanysty vaktsına almasa, 12 balada medıtsınalyq qarsy kórsetilim bolǵan. Al bir sábı ekpe salynatyn jasqa áli jetpegen.
- Kókjótel – tynys alý joldaryn zaqymdaıtyn óte juqpaly bakterııalyq ınfektsııa. Ásirese bul aýrý náresteler men balalar úshin qaýipti. Kókjóteldiń aldyn alýdyń eń tıimdi joly – ýaqtyly vaktsına alý, - delingen aqparatta.
Eske salsaq, osyǵan deıin Qazaqstanda kókjótelmen aýyrǵandar sany 2,4 ese azaıǵany habarlanǵan.
