Shyǵys Qazaqstanda kóktemde 600-den astam azamat áskerge attanady

ÓSKEMEN. KAZINFORM – Shyǵys Qazaqstan oblysynda 1 naýryzda bastalatyn kezekti merzimdi áskerı qyzmetke shaqyrý naýqanyna daıyndyq júrgizilip jatyr. 

Bul týraly óńirlik kommýnıkatsııalar qyzmetinde ótken baspasóz-konferentsııasynda ShQO qorǵanys isteri jónindegi departamenti bastyǵynyń orynbasary Jánibek Saparov málimdedi.

– Áskerge shaqyrylatyn azamattardy habardar etý olardyń turǵylyqty mekenjaıyna nemese jumys ornyna joldanatyn jeke shaqyrtý qaǵazy, 1414 nómirinen jiberiletin SMS-habarlamalar arqyly júzege asyrylady. Bıyl óńir boıynsha 600-den astam jigit ásker qataryna qosylady dep josparlanǵan, - deıdi ol.

Áskerge shaqyrýdy keıinge qaldyrý nemese odan bosatý qyzmetteri elektrondy formatta usynylady. Bul qyzmetter jergilikti atqarýshy organdar arqyly tegin kórsetiledi. 

Departament mamandary turǵyndardy áskerı qyzmetten bosatý nemese keıinge qaldyrý máselesin «aqsha arqyly sheship berýge» ýáde etetin alaıaqtarǵa senbeýge shaqyrdy. 

– Sonymen qatar áskerı bilim alýǵa nıetti jastar úshin múmkindik mol. Qazaqstannyń áskerı joǵary oqý oryndaryna túsý úshin úmitkerler 30 sáýirge deıin onlaın nemese áskerı komıssarıat arqyly ótinish berýi tıis. Úmitkerler UBT-dan keminde 50 ball jınap, medıtsınalyq tekserýden, psıhologııalyq irikteýden jáne dene daıyndyǵy synaǵynan ótedi. 2026 jyldan bastap qujattardy onlaın tapsyrý tolyq engizildi, - deıdi Jánibek Saparov. 

Eske salsaq, buǵan deıin Ulttyq ulan áskerı qyzmetkeri halyqaralyq dron-jarysynda júldege ıe bolǵany habarlanǵan.