Shyǵys Qazaqstanda kóbelektiń sırek kezdesetin túri anyqtaldy
ÓSKEMEN. KAZINFORM – Shyǵys Qazaqstan oblysy aýmaǵynda kóbelektiń sırek kezdesetin túri anyqtaldy.
Katonqaraǵaı memlekettik ulttyq tabıǵı parkinen usynǵan málimetke súıensek, ǵylym, ekologııalyq monıtorıng jáne aqparat bólimi josparly dala jumystaryn júrgizgen.
Sonyń barysynda bólim mamandary Zoologııa ınstıtýtynyń entomologııa zerthanasynyń ǵylymı qyzmetkeri, doktor Sergeı Tıtovpen birlesip, Shyǵys Qazaqstan oblysynda sırek kezdesetin kóbelektiń túrin anyqtady.
«Kóbelektiń bul túri - Helıs pardalına dep atalady. Ol Zaısan shuńqyrynyń aýmaǵynda Ashýtas shatqalynda tirkeldi. Buǵan deıin bul kóbelek tek ońtústik-shyǵys jáne batys Qazaqstan men Túrikmenstanda mekendeıdi dep kórsetilgen. Biz bul kóbelekti tabıǵatta sýretke túsirip úlgerdik. Fotosýretter men skanogafııalar bar ǵylymı maqala Ecologica Montenegrina jýrnalyna jiberildi», - deıdi ulttyq park qyzmetkerleri.
