Shyǵys Qazaqstanda káriz júıeleriniń jartysynan astamy tozyp tur

ÓSKEMEN. KAZINFORM — Shyǵys Qazaqstan oblysynda káriz júıeleriniń jartysynan astamy tozyp, tazartý qurylǵylary ábden eskirgen.

Ótken ǵasyrda salynǵan káriz júıesi búginde sarqyndy sýdyń kólemine tótep bere almaıdy.

— Munyń saldary aıtarlyqtaı joıqyn bolýy múmkin. Jergilikti deńgeıdegi apattardan bastap, Ertis ózenine las qaldyqtardyń tógilýine deıin ákelip soǵý qaýpi bar. Al Ertis — transshekaralyq ózen. Onyń lastanýy tek Qazaqstan úshin emes, kórshiles elder úshin de ekologııalyq qater tóndiredi, — deıdi ekologtar.

Sońǵy jyldary tazartý qurylǵylaryn jańartý boıynsha josparlar birneshe ret keıinge qaldyrylyp keldi. Buǵan jergilikti bıýdjet qarajatynyń jetkiliksizdigi jáne kommýnaldyq kásiporyndar úshin naqty yntalandyrýdyń bolmaýy sebep bolǵan. Alaıda bıyl bul máselede serpilis baıqalyp otyr.

— Bul jaı ǵana tehnıkalyq tozý máselesi emes. Keıbir qalalarda tazartý qurylǵylary 50 jyldan astam ýaqyt boıy kúrdeli jóndeýsiz jumys istep keledi. Máselen, Rıdderde tazartý stantsııasy 1970 jyldardyń basynan beri úzdiksiz paıdalanylyp kele jatyr. Sondyqtan muny jańǵyrtý emes, qaýipsizdik máselesi dep qaraǵan jón, — deıdi oblystyq Energetıka jáne TÚKSh basqarmasy basshysynyń orynbasary Raýan Turysbek.

Onyń aıtýynsha, qazirgi ýaqytta Óskemen, Rıdder, Altaı jáne Serebrıansk qalalarynda tehnıkalyq-ekonomıkalyq negizdemeler ázirlenip jatyr. Rıdder boıynsha qujat memlekettik saraptamaǵa joldanǵan. Qalǵan qalalarda jumys belsendi júrgizilýde. Sonymen qatar halyqaralyq qarjy ınstıtýttary arqyly ınvestıtsııa tartý joldary qarastyrylyp jatyr. 
Eske salsaq, osyǵan deıin Qyzylordadaǵy káriz sýy jınalatyn stantsııa turǵyn úılerge tym jaqyn ornalasqany jaıly jazǵanbyz.