Shyǵys Qazaqstanda qar kóshkini túsiriledi

ÓSKEMEN. KAZINFORM – Shyǵys Qazaqstan oblysynda erteń jasandy jolmen qar kóshkini túsirilmek. 

Bul týraly «Kazselezaşıta» MM oblystyq fılıalynan málim etti.

- 19 jeltoqsanda saǵat 10.00-de oblystyq mańyzy bar Óskemen-Tarǵyn-Samar tasjolynyń (132-137 shaqyrymynda) ýchaskesinde profılaktıkalyq maqsatta qar kóshkini túsiriledi. Sondyqtan kólik júrgizýshilerine óz baǵyttaryn aldyn ala josparlap alýǵa keńes beremiz, - delingen aqparatta.

Osy rette, ShQO Tótenshe jaǵdaılar departamenti óńir jurtshylyǵyn taýly jerlerge barýdan bas tartýǵa shaqyrdy. Sebebi aldaǵy kúnderi qar kóshkini júrý qaýpi saqtalady.

- Eger qandaı da bir qıyndyqqa tap bolsańyzdar, birden «112» nómirine qońyraý shalyńyz. Alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip alyńyz, - dep habarlady departamenttiń baspasóz qyzmetinen.

Eske salsaq, osyǵan deıin Qazaqstanda 19-21 jeltoqsan kúnderi boran soǵyp, qar jaýatyndyǵy habarlanǵan.