Shyǵys Qazaqstanda qar kóshkini túsirildi
ÓSKEMEN. KAZINFORM – Shyǵys Qazaqstan oblysynda jasandy jolmen qar kóshkini túsirildi.
ShQO Tótenshe jaǵdaılar departamenti baspasóz qyzmetiniń málimetine súıensek, óńirdiń taýly aımaqtarynda sońǵy kúnderi qar mol jaýýyna baılanysty kóshkin júrý qaýpi artty.
- Osyǵan baılanysty qutqarýshylar men QR TJM «Qazseldenqorǵaý» ShQ fılıalynyń mamandary profılaktıkalyq maqsatta qar kóshkinin júrgizdi. «Óskemen-Altaı-Rahman qaınarlary» tasjolynyń ýchaskesinde jarylys jasalyp, 380 tekshe metr qar túsirildi. Bul jer únemi baqylaýǵa alynǵan. Sebebi kólik jıi júretin ýchaskede qar kóshkini júrý yqtımaldyǵy joǵary, - delingen aqparatta.
Osy rette, TJD qyzmetkerleri oblys jurtshylyǵyna taýly aımaqtarda qar kóshkini qaýpi áli de baryn aıtyp, barynsha saq bolýǵa shaqyrdy.
Eske salsaq, buǵan deıin SQO-da bıyl qar bıiktigi de, ylǵal mólsheri de byltyrǵydan tómendigi habarlanǵan.