Shyǵys Qazaqstanda qamysty sharpyǵan órtti aýyzdyqtaýǵa tikushaq tartyldy

ÓSKEMEN. KAZINFORM – Shyǵys Qazaqstan oblysy Zaısan aýdanynda órt sóndirýshiler qamys pen shópti sharpyǵan tilsiz jaýmen áli kúresip jatyr.

ShQO Tótenshe jaǵdaılar departamenti baspasóz qyzmetiniń málimetine súıensek, Zaısan aýdanynyń Birjan aýyldyq okrýgine qarasty Shubyraǵash aýmaǵynda qamys pen qurǵaq shóp janǵan. Bul batpaqty ári tehnıka qozǵalysyna qolaısyz jer.

— Órtpen kúreske 85 adam, 15 tehnıka jumyldyryldy. Qosymsha 20 adam men sý tasıtyn kólik, soqasy bar traktor jáne júk tıegish kómekke jiberildi. Mı-8 tikushaǵy da tartyldy. Onyń bortynda 11 qutqarýshy bar. Barlyq qajetti qutqarý jabdyqtary tıelgen. Sondaı-aq tikushaqty janarmaımen qamtamasyz etý úshin janarmaı tasıtyn kólik te jolǵa shyqty, — delingen aqparatta.

Órtti sóndirýge jyldamdyǵy sekýndyna 19-20 metrge deıin jetetin jel qıyndyq týdyryp otyr.

Eske salsaq, osyǵan deıin Zaısan aýdanynda qamys órtengeni jaıly jazǵanbyz.