Shyǵys Qazaqstanda Eńbek kúni atalyp ótti
ÓSKEMEN. KAZINFORM – Shyǵys Qazaqstan oblysynda Eńbek kúnine oraı saltanatty shara ótti.
Búgin Óskemendegi oblystyq fılarmonııanyń kontsert zalynda Eńbek kúnine oraı saltanatty shara uıymdastyryldy. Oǵan ShQO ákiminiń atynan birinshi orynbasary Nurymbet Saqtaǵanov qatysty.
«Túrli mamandyqta ter tógip júrgen azamattar oblystyń, elimizdiń damýyna zor úles qosyp jatyr. Ár sala qyzmetkerleriniń kúndelikti qajyr-qaıratynyń arqasynda óńir ekonomıkasy órkendep keledi», - dedi ol quttyqtaý sózinde.
Shara barysynda eńbek adamdarynyń arasyndaǵy úzdikter marapattaldy. Olardyń qatarynda temir jelimdeýshiler, temir jonýshylar, metallýrgter, azamattyq qorǵaý salasynyń ardagerleri bar. Sonyń biri – oblystyq Tótenshe jaǵdaılar departamentiniń azamattyq qorǵaý ardageri Ivan Hýdıakov.
«Eńbek ardageri» medalimen marapattalǵan ol eńbek jolyn 1979 jyly qarapaıym órt sóndirýshi bolyp bastaǵan. Qazir jasy 66-da.
«Áli kúnge deıin qoǵamdyq jumystarmen aınalysyp kelemin. Sebebi qoǵamǵa paıdaly bolǵym keledi. Men ózimdi baqytty adammyn dep sanaımyn. Óıtkeni búkil ómirimdi súıikti mamandyǵyma arnadym», - deıdi Ivan Hýdıakov.
Sodan soń merekelik kontsert qoıylyp, eńbek adamdarynyń qurmetine áýeletip án shyrqaldy.
